ایران نے بین الاقوامی ایئرلائنز کو خبردار کردیا ہے کہ وہ ایرانی فضائی حدود استعمال نہ کریں۔
مصر کے میڈیا نے اپنے ملک کی وزارت ایوی ایشن کے ذرائع کے حوالے سے یہ دعویٰ کیا ہے اور کہا ہے کہ ایران نے اس کی وجہ فوجی مشقیں بتائی ہیں۔
یہ بھی پڑھیں: ایران آئندہ 48 گھنٹوں میں اسرائیل پر جوابی حملہ کرسکتا ہے، امریکی وزیر خارجہ
ایران کی جانب سے ہدایات جاری ہونے کے بعد مصر اور برطانیہ نے اپنی پروازوں کو ایران اور لبنان کی فضائی حدود استعمال کرنے سے روک دیا ہے۔
مصر کی وزارت سول ایوی ایشن کی جانب سے جاری نوٹم میں کہا گیا ہے کہ مصری ایئرلائنز تہران فلائٹ انفارمیشن ریجن میں پروازوں سے گریز کریں۔
نوٹم میں ہدایت کی گئی ہے کہ مصری ایئرلائنز کے طیارے تہران فلائٹ انفارمیشن ریجن میں پاکستانی وقت کے مطابق 8 اگست کی صبح 6 تا 9 بجے کے درمیان ایرانی فضائی حدود استعمال نہ کریں۔
یہ بھی پڑھیں: اسماعیل ہنیہ کے قتل کا بدلہ لینے کے طریقے پر غور کررہے ہیں، ایرانی سپہ سالار
دوسری جانب، تہران کے بین الاقوامی ہوائی اڈے کے سربراہ سعید چلنداری نے ان اطلاعات کی سختی سے تردید کرتے ہوئے کہا کہ ایئرلائنز کو صرف ایران کے مغربی حصے کی فضائی حدود استعمال نہ کرنے کی ہدایت جاری کی گئی ہے۔
واشنگٹن میں قائم ’کریٹیکل تھریٹس پروجیکٹ‘ کے مطابق، 31 جولائی سے اب تک ایران کی جانب سے میزائل، راکٹ فائر کیے جانے اور گنز کے استعمال سے متعلق 8 نوٹمز جاری کیے جاچکے ہیں۔
واضح رہے کہ امریکی اخبار نیویارک ٹائمز نے گزشتہ ہفتے دعویٰ کیا تھا کہ ایران کے سپریم لیڈر آیت اللہ خامنہ ای نے حماس رہنما اسماعیل ہنیہ کے قتل کا بدلہ لینے کے لیے ایرانی حکام کو اسرائیل پر براہ راست حملوں کا حکم دیا تھا۔
