کئی کتابوں کے مصنف، کالم نویس اور گولڈ میڈلسٹ عمران ملک نے پیرس اولمپکس میں گولڈ میڈل جیتنے اور جیولن تھرو میں اولمپک ریکارڈ توڑنے والے مایہ ناز قومی ہیرو ارشد ندیم پر کتاب لکھنے اور بین الاقوامی معیار کی فلم بنانے کا اعلان کردیا۔
یہ بھی پڑھیں: ارشد ندیم کو پاکستان کے دوسرے بڑے سول ایوارڈ ہلال امتیاز سے نوازا جائے گا
اے پی پی کے عمران ملک نے کہا ہے کہ ارشد ندیم کی کامیابی کو اقوام عالم میں بہت سراہا جا رہا ہے اور ان کی اس عظیم کامیابی کی وجہ سے پاکستان کو بھی دنیا بھر میں بہت پذیرائی ملی ہے۔
انہوں نے مزید کہا کہ خاص طور پر ہمارے ہمسایہ ممالک میں پاکستان کے بہت چرچے ہو رہے ہیں اور ارشد ندیم کی زندگی اور کامیابیوں کے بارے میں مختلف چینلز پر پروگرام دکھائے جا رہے ہیں۔
عمران ملک نے کہا کہ ایک غریب گھرانے سے تعلق رکھنے والے ارشد ندیم جن کے پاس بین الاقوامی معیار کا سامان اورمناسب سہولیات بھی دستیاب نہیں تھیں نے اپنی انتھک محنت، لگن، جدو جہد اور جذبے کے ساتھ وہ کر دکھایا جس نے پوری دنیا کو حیران کر دیا۔
مزید پڑھیے: والدہ نیرج چوپڑا کے ارشد ندیم کو سراہنے پر نریندر مودی کا کیا ردعمل تھا؟
مصنف عمران ملک نے کہا کہ ارشد ندیم کی زندگی پر لکھی جانے والی کتاب اور بنائی جانے والی فلم موجودہ اورآنے والی نسلوں کے لیے مشعل راہ ہو گی۔
مزید پڑھیں: کراچی پریس کلب نے ارشد ندیم کو اپنا لائف ممبر بنانے کا اعلان کردیا
ان کا کہنا تھا کہ ہمارے نوجوان ارشد ندیم کی انتھک محنت، جدو جہد اور کامیابی سے بہت کچھ سیکھ سکیں گے جنہوں نے مشکل سے مشکل حالات میں بھی اپنی محنت اور حوصلے کو کم نہیں ہونے دیا اور وہ کچھ کر دکھایا جسے تاریخ میں سنہری حروف سے لکھا جائے گا اور ہمیشہ یاد رکھا جائے گا۔
