سابق وزیراعظم اور بانی چیئرمین پاکستان تحریک انصاف عمران خان نے کہا کہ جنرل باجوہ نے نواز شریف سے ڈیل کرکے جنرل فیض کو تبدیل کیا تھا۔ بانی پی ٹی آئی کا جنرل فیض سے کوئی سیاسی تعلق نہیں تھا۔ عوام آزادی کی خاطر آج گھروں سے نکلیں۔ یہ وقت ملک کی خاطر نکلنے کا ہے۔
اڈیالہ جیل میں پاکستان تحریک انصاف کے تعلق رکھنے والے وکلا رہنماؤں سے ملاقات میں عمران خان کا کہنا تھا کہ جنرل فیض کی گرفتاری فوج کا اندرونی معاملہ ہے۔ پی ٹی آئی کا جنرل فیض کی گرفتاری سے کوئی تعلق نہیں۔
بانی چیئرمین پاکستان تحریک انصاف عمران خان سے وکلاء رہنماؤں کی ملاقات کے بعد بانی پی ٹی آئی کے وکیل انتظار پنجوتھہ نے دیگر وکلاء کے ہمراہ میڈیا سے گفتگو کرتے ہوئے کہا ہے کہ بانی پی ٹی آئی سے وکلاء ٹیم کی تفصیلی ملاقات ہوئی ہے۔ وہ (بانی پی ٹی آئی) بھی بالکل کلئیر ہیں، جنرل فیض سے ان کا کوئی سیاسی تعلق نہیں تھا۔ جنرل باجوہ نے نواز شریف سے ڈیل کرکے جنرل فیض کو تبدیل کیا تھا۔
عمران خان نے کہا ہے کہ اگر جنرل فیض کی گرفتاری کا تعلق نو مئی سے ہے تو یہ بہت اچھا موقع ہے، اس کے لیے جوڈیشل کمیشن بنایا جائے۔ سابق وزیراعظم نے مطالبہ کیا کہ نو مئی کی سی سی ٹی وی فوٹیجز سامنے لائی جائیں۔
بانی پی ٹی آئی نے کہا ہے کہ عوام آزادی کی خاطر آج گھروں سے نکلیں۔ آج کی رات پرامن طریقے سے نکلنے کی کال دی ہے۔ یہ وقت ملک کی خاطر نکلنے کا ہے۔
عمران خان نے کہا کہ سپریم کورٹ پر دباؤ ڈالا جارہا ہے، ہماری تین نشستیں کل چھینی گئی ہیں۔ قاضی فائز عیسیٰ کو اب پیچھے ہٹ جانا چاہیے۔
بانی پی ٹی آئی نے کہا نوجوانوں کی امید ختم ہورہی ہیں، پاکستان سے لوگ دیگر ممالک کی نسبت زیادہ بیرون ملک جارہے ہیں۔ بنگلہ دیش سے برے حالات پاکستان میں ہیں، اس لیے ارباب اختیار ہوش کے ناخن لیں۔ بانی پی ٹی آئی نے سابق کمشنر راولپنڈی کو بازیاب کرانے کا مطالبہ بھی کیا۔
