پیرس اولمپکس میں نیزہ پھینکنے کے مقابلے میں گولڈ میڈل جیتنے والے ارشد ندیم نے یوم آزادی کے موقع پر قوم کے نام ایک خصوصی پیغام جاری کیا ہے جس میں انہوں نے پاکستانی قوم سے اپیل کی کہ وہ یوم آزادی کے موقع پر ایک قوم بن کر اس بات کا تہیہ کرلیں کہ وہ ایک ہیں۔ ارشد ندیم نے فیس بک پر اپنی ویڈیو پیغام میں کہا’ جس طرح آٹھ اگست کو پیرس اولمپکس نیزہ پھینکنے میں گولڈ میڈل جیتنے کے موقع پر نہ صرف پاکستان بلکہ دنیا بھر میں مقیم پاکستانیوں میں خوشی کی لہر دیکھی گئی۔ میں چاہتا ہوں کہ آپ ایک بار پھر میرا ساتھ دیں۔
جس طرح میں 14 اگست کے لیے اپنے تمام سوشل میڈیا اکاؤنٹس کی پروفائل پکچر بدل کر اس مہم کا آغاز کر رہا ہوں، آپ سب بھی میرا ساتھ دیں۔اپنی پروفائل پکچر اپ ڈیٹ کریں اور یک جان ہوکر پوری دنیا کو دکھائیں۔
ارشد ندیم کے اس خصوصی پیغام کا ایک دلچسپ یہ بھی تھا کہ جب وہ پاکستانی قوم کو خصوصی پیغام دے رہے تھے، ویڈیومیں خراٹوں کی مسلسل آواز آ رہی تھی جس پر سوشل میڈیا پر بھی دلچسپ بحث شروع ہوگئی۔
سعدیہ مظہر نامی ایک سوشل میڈیا صارف نے تبصرہ کرتے ہوئے لکھا ’ ارشد کی آواز کے علاوہ آواز سننے والے لیجینڈز ہیں۔۔۔۔ ششش ۔۔۔۔۔ پاکستانی قوم گہری نیند سو رہی ہے۔ صحافی فیض اللہ خان نے انھیں قومی خراٹے قرار دیا۔ ایک دوسرے سوشل میڈیا صارف فدا محمد خان نے لکھا کہ پاکستان خراٹے لے رہا ہے۔
