سینیٹ کی قائمہ کمیٹی برائے انفارمیشن ٹیکنالوجی (آئی ٹی) نے وزارت انفارمیشن ٹیکنالوجی (آئی ٹی) سے ملک بھر میں انٹرنیٹ سروس میں سست روی اور سوشل میڈیا ایپس ڈاؤن ہونے سے متعلق 2 ہفتے میں رپورٹ طلب کرلی ہے۔
اسلام آباد میں سینیٹرپلوشہ خان کے زیرصدارت سینیٹ کی قائمہ کمیٹی برائے انفارمیشن ٹیکنالوجی (آئی ٹی) کے اجلاس میں حکومتی اور اپوزیشن اراکین نے سوال کیا کہ انٹرنیٹ سروس سست روی کا شکار کیوں ہے۔
یہ بھی پڑھیں: ملک بھر میں انٹرنیٹ کی سست روی! پاکستانیوں کو لاکھوں ڈالرز کا نقصان ہوگا؟
سینیٹر افنان اللہ اورسینیٹر ہمایوں مہمند سمیت دیگر ارکان نے سست انٹرنیٹ سروس کے معاملے پر احتجاج کیا، کمیٹی ارکان کے سوالات پر سیکریٹری انفارمیشن ٹیکنالوجی (آئی ٹی) عائشہ حمیرا کوئی تسلی بخش جواب نہ دے سکییں، تاہم انہوں نے کہا کہ موبائل آپریٹرز کی سروس میں مسئلہ ہے، ان سے ڈیٹا جمع کررہے ہیں، جلد انٹرنیٹ بحال ہوگا، 2 ہفتوں میں تفصیل پیش کردیں گے۔
اجلاس کے دوران سینیٹر افنان اللہ نے کہا کہ اس وقت فری لانسرز کا کاروبار 500 ملین ڈالر کا ہے، ان کا نقصان ہورہا ہے، انٹرنیٹ سروس بند کرکے یہ نہیں کہا جاسکتا کہ سیکیورٹی کا مسئلہ ہوگیا ہے۔ کمیٹی ارکان نے اجلاس کے دوران سوشل میڈیا ایپس ڈاؤن ہونے کا معاملہ بھی اٹھایا، سینیٹر ہمایوں مہمند نے کہا کہ انٹرنیٹ، سوشل میڈیا ایپس سست ہونے سے بزنس متاثر ہورہا ہے۔
یہ بھی پڑھیں: ملک میں انٹرنیٹ سست روی کا شکار کیوں ہوا؟ پی ٹی اے کا موقف سامنے آگیا
سیکریٹری آئی ٹی عائشہ حمیرا نے کہا کہ موبائل آپریٹرز کی سروس میں خلل آیا ہے، کوئی تکنیکی مسئلہ ہوسکتا ہے جو جلد حل ہوجائے گا، کمیٹی نے انٹرنیٹ، سوشل میڈیا ایپس ڈاؤن ہونے سے نقصانات کی رپورٹ طلب کرتے ہوئے 2 ہفتوں میں مسئلہ حل کرنے کی ہدایت بھی جاری کردیں۔
دوران اجلاس بلوچستان کے بیشتر علاقوں میں موبائل نیٹ ورک کی عدم دستیابی سمیت دیگرمسائل پر بھی تبادلہ خیال کیا گیا، سینیٹر پلوشہ خان نے ہدایت کی کہ آئندہ اجلاس میں کشمور سمیت 20 شہروں کے سروے پر بریفنگ دی جائے۔
ڈی جی انفورسمنٹ پاکستان ٹیلی کمیونیکیشن اتھارٹی نے اجلاس کو بتایا کہ بلوچستان میں 10 سے 12 گھنٹے تک بجلی کی لوڈشیڈنگ ہے، ضلع کشمور میں نیٹ ورک مسائل پرایک ہفتہ کا وقت دے دیں مکمل تفصیل دیں گے تاہم آئندہ اجلاس میں پورے پاکستان کا نیٹ ورک کوالٹی سروے طلب کرلیا گیا ہے۔
