پنجاب حکومت نے صوبے اور اسلام آباد کے بجلی صارفین کو 14 روپے فی یونٹ ریلیف دینے کے لیے بجلی کمپنیوں کو خطوط ارسال کردیے۔
ترجمان وزیراعلیٰ پنجاب نے بتایا ہے کہ مریم نواز کی ہدایت پر 5 بجلی کمپنیوں کو خطوط ارسال کیے گئے ہیں۔
یہ بھی پڑھیں بجلی کے بلوں میں ریلیف، مریم نواز کا مصطفیٰ کمال کی تنقید پر جواب
ترجمان کے مطابق اسلام آباد، لاہور، گوجرانوالہ، فیصل آباد اور ملتان کی ڈسکوز کو خطوط بھجوائے گئے ہیں۔
خط میں حکومت کی جانب سے بجلی قیمت میں 14 روپے فی یونٹ کمی کے فیصلے سے آگاہ کیا گیا ہے۔
ترجمان نے بتایا کہ آئیسکو، میپکو، گیپکو، فیسکو اور لیسکو 201 سے 500 یونٹ تک بجلی استعمال کرنے والے صارفین کے بلوں میں کمی کریں گی، جبکہ بجلی کی اصل لاگت اور ریلیف کے درمیان فرق پنجاب حکومت ادا کرے گی۔
ترجمان نے بتایا کہ اگست اور ستمبر کے لیے بجلی کی قیمت میں 14 روپے فی یونٹ کمی کی گئی ہے، اور اس کے لیے پنجاب حکومت 45 ارب روپے اپنے وسائل سے فراہم کرے گی۔
یاد رہے کہ 2 روز قبل سابق وزیراعظم نواز شریف نے اپنی صاحبزادی وزیراعلیٰ پنجاب مریم نواز کے ہمراہ گفتگو کرتے ہوئے 500 یونٹ تک بجلی استعمال کرنے والے شہریوں کے لیے ریلیف کا اعلان کیا تھا۔
یہ بھی پڑھیں گورنر سندھ کا پنجاب کی طرز پر بجلی سستی کرنے کے لیے صوبائی حکومت کو خط لکھنے کا اعلان
نواز شریف نے کہا تھا کہ مجھے احساس ہے کہ ملک کے عوام مہنگائی کے باعث ایک کرب سے گزر رہے ہیں، اس لیے 500 یونٹ تک بجلی استعمال کرنے والے صارفین کو 14 روپے فی یونٹ ریلیف دیا جارہا ہے۔
