اسلام آباد میں گاڑی کی ٹکر سے ایک شخص کی ہلاکت کے بعد گاڑی چلانے والے چینی شہری کو حراست میں لے لیا ہے۔
ریسکیو ذرائع کے مطابق ایف9 پارک کے قریب گاڑی کی ٹکر سے جاں بحق ہونے والے شہری کی شناخت 23 سالہ ولی اللہ کے نام سے ہوئی ہے، شہری سے ٹکرانے کے بعد گاڑی کے الٹ جانے سے غیرملکی ڈرائیور بھی زخمی ہوگیا تھا۔
یہ بھی پڑھیں: کراچی سے اسلام آباد جانے والی بس کو خوفناک حادثہ، خواتین اور بچوں سمیت18افراد جاں بحق
پولیس ذرائع کے مطابق گاڑی ڈرائیور کو پولیس نے حراست میں لے کر تھانہ مارگلہ منتقل کردیا ہے، چینی نژاد ڈرائیور کیخلاف مقدمہ جاں بحق شہری کے بھائی کی مدعیت میں درج کیا گیا ہے، جس میں تیز رفتار ڈرائیونگ سے قتل کرنے کی دفعات لگائی گئی ہیں۔
عینی شاہد کے مطابق گاڑی چینی شہری چلا رہا تھا، اور اچانک ٹائر کے پھٹ جانے سے گاڑی بےقابو ہوکر نوجوان شہری سے ٹکرائی جو موقع پر ہی جاں بحق ہو گیا تھا۔
مزید پڑھیں: لاپتا طالبعلم کی لاش کھائی سے مل گئی: ’ٹریل 5 بھی اب محفوظ نہیں‘
مذکورہ حادثہ اسلام آباد کے نیو بلیو ایریا کے سامنے جناح ایوینیو ایف 9 پارک کے مہران گیٹ کے قریب پیش آیا تھا۔
