پشین کے علاقے کلمہ چوک کے قریب دھماکے سے 2 بچے جاں بحق، 5 پولیس اہلکاروں سمیت 12 افراد زخمی ہوگئے ہیں۔
پشین پولیس کے مطابق بلوچستان کے ضلع پشین میں کلمہ چوک کے قریب زور دار دھماکا ہوا ہے، جس سے 2 بچے موقع پر جاں بحق ہوگئے۔
دھماکے سے 5 پولیس اہلکاروں سمیت 12 افراد زخمی ہوئے ہیں، جن میں 2 کی حالت تشویشناک ہے، دھماکے سے ایک گاڑی اور ایک موٹرسائیکل تباہ ہوگئے، زخمیوں اور لاشوں کو اسپتال منتقل کردیا گیا ہے۔
پولیس کا کہنا ہے کہ دھماکے کی نوعیت کا تعین کرنے کے لیے بم ڈسپوزیبل اسٹواد کو طلب کرلیا گیا، جبکہ علاقے کو گھیرے میں لے کر شواہد اکٹھے کیے جارہے ہیں۔
’سماج دشمن اور ریاست مخالف عناصر کسی رعایت کے مستحق نہیں‘
ترجمان بلوچستان حکومت شاہد رند نے دھماکے کی مذمت کرتے ہوئے کہا ہے کہ دہشت گردی کے واقعات میں قیمتی انسانی جانوں کے ضیاع کا افسوس ہے، سماج دشمن اور ریاست مخالف عناصر کسی رعایت کے مستحق نہیں۔
شاہد رند نے کہا کہ دہشت گرد اپنے مذموم مقاصد کے حصول کے لیے معصوم اور بے گناہ افراد کو نشانہ بنارہے ہیں، دھماکے میں زخمی ہونے والے افراد کو بہترین طبی سہولیات فراہم کی جائیں گی۔