پاکستان کرکٹ ٹیم کے فاسٹ بولر شاہین شاہ آفریدی اور انشا آفریدی کے ہاں بیٹے کی پیدائش پر سابق کپتان شاہد آفریدی نانا بن گئے ہیں، جس پر انہوں نے خود کو دنیائے کرکٹ کا کم عمر ترین نانا قرار دیا۔
سماجی رابطے کی سائٹ ’ایکس‘ پر اپنے ایک بیان میں شاہد آفریدی نے لکھا کہ مجھے نانا بننے پر احباب کی جانب سے محبت بھرے پیغامات وصول ہورہے ہیں، جس پر سب کا شکر گزار ہوں۔
انہوں نے کہاکہ آپ لوگ ہماری خوشیوں میں شریک ہوئے جس پر میری فیملی آپ سب کی شکر گزار ہے۔
واضح رہے کہ شاہین شاہ آفریدی کے ہاں آج ہی بیٹے کی ولادت ہوئی ہے جب وہ راولپنڈی اسٹیڈیم میں بنگلہ دیش کے خلاف ٹیسٹ میچ کھیل رہے تھے۔
شاہین شاہ آفریدی اور اور انشا آفریدی 3 فروری 2023 کو رشتہ ازدواج میں منسلک ہوئے تھے، انشا آفریدی شاہد آفریدی کی صاحبزادی ہیں۔
