چیئرمین پاکستان پیپلزپارٹی بلاول بھٹو نے کہا ہے کہ 9 ججوں کا بینچ چلتے چلتے اب 3 ججوں تک پہنچ گیا ہے اس لیے مناسب بات ہے کہ الیکشن التوا کیس کی سماعت کے لیے لارجر بینچ بنا دیا جائے۔خدا نخواستہ کہیں ایسی صورت حال پیدا نہ ہو جائے کہ معاملہ مارشل لا کی طر ف چلا جائے۔
لاڑکانہ میں میڈیا سے گفتگو کرتے ہوئے بلاول بھٹو کا کہنا تھا 3 ججوں کی جانب سے ساتھی ججز پرعدم اعتماد سامنے آ رہا ہے اس لیے 3 ججوں کو سوچنا چاہیے کہ ایسا کیوں ہو رہا ہے۔
انہوں نے کہا اس کیس کی سماعت کے لیے لارجر بینچ بنا دیا اور اس میں وہ تمام جج نہ بیٹھیں جو اپوزیشن کے ساتھ مشورہ کرتے پکڑے گئے۔
لارجر بینچ نہیں بنتا تو خدا نخواستہ ایسی صورت حال پیدا نہ ہوجائے کہ معاملہ مارشل لا کی طرف جائے۔
انہوں نے کہا کہ سپریم کورٹ کا اپنا ٹرائل چل رہا ہے اور آپ کے اپنے ساتھی ججز آپ کے کردار کے خلاف ہیں۔ادارے میں جو کچھ ہو رہا ہے وہ سب کے سامنے ہے۔
بلاول بھٹو کا کہنا تھا کہ سپریم کورٹ کا ماضی ہمارے سامنے ہے اور اس وقت سیاست یرغمال ہو چکی ہے۔
انہوں نے کہا کہ ہم ہر وقت الیکشن کے لیے تیار ہیں لیکن اگر لارجر بینچ نہیں بنتا تو چیف جسٹس کو تاریخ یاد رکھے گی۔
بلاول بھٹو کا کہنا تھا کہ پہلی بار پیپلز پارٹی کراچی کا میئر بنانے جا رہی ہے۔
