لندن میں شریف فیملی کی رہائش گاہ ایون فیلڈ اپارٹمنٹس کے باہر اپنے مسلسل احتجاج سے شہرت پانے والا پاکستانی نژاد نوجوان شایان علی ایک بار پھر سوشل میڈیا ٹائم لائنز پر نمایاں ہو رہا ہے۔
شایان علی کے متحرک ہونے کی وجہ مسلم لیگ ن کے صدر اور سابق وزیراعظم نواز شریف ہیں جن کے بارے میں خبریں گردش کر رہی ہیں کہ آئندہ ماہ ان کا لندن جانے کا امکان ہے، نواز شریف کی لندن روانگی کی خبروں کے ساتھ ہی شایان علی نے ایون فیلڈ کے باہر وکٹری کا نشان بناتے ہوئے لکھا کہ ’میں تیار ہوں‘۔
I am ready pic.twitter.com/LS3LlMB016
— Shayan Ali (@ShayanA2307) August 28, 2024
واضح رہے شایان علی لندن میں شریف خاندان کے فلیٹ کے باہر شایان علی چور اور مافیا کے نعرے لگاتا رہتا تھا۔ کبھی ن لیگ کے رہنماؤں کے استقبال کے لیے ایئرپورٹ پہنچ جاتا تھا تو کبھی اُنھیں کسی کافی شاپ میں گھیر لیتا تھا۔ گزشتہ برس نواز شریف کی پاکستان واپسی کے بعد ان کی ایک ویڈیو سوشل میڈیا پر وائرل ہوئی تھی جس میں انہیں آئس کریم بوائے کے روپ میں بھی دیکھا گیا۔
شایان علی کی ویڈیو شیئر کرنے والوں نے دعوی کیا کہ ’لندن سے نواز شریف کی پاکستان واپسی کے بعد شایان نے آئسکریم فروخت کرنے کی ملازمت‘ شروع کر دی ہے۔ ویڈیو میں شایان علی کو کسی خاتون سے مخاطب ہوتے دکھایا گیا ہے۔
یہ بھی پڑھیں: نواز شریف کی واپسی کے بعد ’شایان علی لندن میں آئسکریم بوائے‘ بن گئے؟
ان سے پوچھا جاتا ہے کہ ’کیا یہ آپ کی نئی پارٹ ٹائم ملازمت ہے؟‘ جواب میں شایان کہتے ہیں کہ ’ہاں آئسکریم بوائے بن گیا ہوں میں، حقیقی آزادی کی آئسکریم چاہیے؟‘
مکالمہ آگے بڑھتا ہے تو ان سے کچھ اور بھی پوچھا جاتا ہے جس کے جواب میں وہ ’منہ میٹھا کرو‘ کی دعوت دیتے اور پھر کہتے ہیں کہ ’لا اسکول شروع کرنے کی خوشی میں‘۔ اس کے بعد وہ منہ چھپاتے ہوئے کہتے ہیں کہ ’صرف جو احتجاج پر آتا ہے اس کو ملتی ہے آئسکریم۔‘
آئس کریم کی ویڈیو وائرل ہونے کے بعد شایان علی نے کہا کہ ’احتجاج کے بعد کچھ دیر کے لیے آئس کریم شاپ کے مالک نے مجھے آئس کریم سرو کرنے کی اجازت دی۔‘
واضح رہے کہ سابق وزیراعظم نواز شریف گزشتہ سال 21 اکتوبر کو وطن واپس پہنچے تھے جبکہ اس سے قبل نواز شریف 4 سالوں سے لندن میں علاج معالجے کے لیے قیام پذیر تھے۔
