سکھر پولیس نے بہاولپور سے تعلق رکھنے والے ایک نوجوان، اس کی 4 رشتہ دار خواتین اور ایک بچے کو کچے کے ڈاکوؤں کے ہاتھوں اغوا ہونے سے بچالیا۔
پولیس کے مطابق، بہالپور کا رہائشی نوجوان نسوانی آواز کے جھانسے میں آکر شادی کرنے کچے کے علاقے سدوجا پہنچا تھا، جبکہ دراصل ڈاکوؤں نے نوجوان کو شادی کا جھانسہ دے کر کچے بلایا تھا۔
یہ بھی پڑھیں: سکھر پولیس کچے کے ڈاکوؤں کیخلاف آپریشن جاری، ایک مغوی بازیاب
پولیس کے مطابق، نوجوان رشتے کی بات کرنے کے لیے خاندان کی 4 خواتین اور ایک بچے کو بھی اپنے ساتھ لے آیا تھا، کچے کے داخلی راستوں پر تعینات پولیس اہلکاروں نے نوجوان اور خواتین سے پوچھ گچھ کی تو پیشگی واردات کا علم ہوا۔
سکھر پولیس کا کہنا ہے کہ نوجوان اور خواتین کو فوراً تحویل میں لے لیا گیا تھا اور انہیں سمجھا بجھا کر واپس بہالپور روانہ کردیا گیا ہے، پولیس کی بروقت کارروائی کی بدولت خواتین اور بچے سمیت 6 افراد کو اغوا ہونے سے بچا لیا گیا ہے۔
