چیئرمین پاکستان تحریک انصاف عمران خان کی زیر صدارت سینئر رہنماؤں کا اجلاس ختم ہوگیا ہے۔
پی ٹی آئی چیئرمین کی زیر صدارت ہونے والے اجلاس میں ملک کی مجموعی سیاسی صورت حال پر تبادلہ خیال کیا گیا۔
اجلاس کے بعد گفتگو کرتے ہوئے اسد عمر کا کہنا تھا کہ عمران خان عید کے بعد انتخابی جلسوں کا آغاز کریں گے ۔ آج کے اجلاس میں انتخابی حکمت عملی پر تفصیلی مشاورت کی گئی ہے۔
انہوں نے کہا کہ اجلاس میں عدلیہ کے ساتھ اظہار یکجہتی کے لیے آئینی طریقہ کار پر بھی غور کیا گیا۔
اسد عمر کا کہنا تھا کہ پی ڈی ایم آئین سے بغاوت کر رہی ہے ۔ عمران خان کے خوف سے یہ اس مقام پر پہنچ گئے ہیں کہ آئین بھی توڑ ڈالیں گے۔
انہوں نے کہا کہ آج رات ملک کے 75 شہروں میں حقیقی آزادی کی جانب بڑھنے کے قدم کا جشن ہوگا ۔
اسد عمر نے کہا کہ پی ڈی ایم کے پاس کوئی بیانیہ نہیں ہے کیوں کہ ان کا عدلیہ مخالف بیانیہ برے طریقے سے پٹ چکا ہے ۔
