بھارت کے مایہ ناز کرکٹر ویرات کوہلی نے ایک اور سنگ میل عبور کرتے ہوئے ہم وطن اور اسٹار بیٹسمین سچن ٹنڈولکر کا ریکارڈ توڑ دیا۔
یہ بھی پڑھیں: ’لڑائی جھگڑا ختم‘، گوتم گمبھیر اور ویرات کوہلی نے تازہ ویڈیو میں کیا پیغام دیا؟
پیر کو کانپور میں بنگلا دیش کے خلاف دوسرے ٹیسٹ کے دوران ویرات کوہلی انٹرنیشنل کرکٹ میں تیز ترین 27 ہزار رنز بنانے والے کھلاڑی بن گئے۔ انہوں نے یہ کارنامہ صرف 594 اننگز میں انجام دیا۔
قبل ازیں تیز ترین 27 ہزار رنز بنانے کا ریکارڈ سچن ٹنڈولکر کے پاس تھا جنہوں نے یہ اعزاز 17 برس قبل 623 اننگز میں حاصل کیا تھا۔
مزید پڑھیے: بھارت کا ٹیسٹ کرکٹ کی تاریخ میں تیز ترین نصف سنچری کا نیا عالمی ریکارڈ
اس طرح ویرات کوہلی 600 سے کم اننگز میں 27000 بین الاقوامی رنز مکمل کرنے والے واحد کرکٹر بھی بن گئے ہیں۔ آسٹریلیا کے سابق کپتان رکی پونٹنگ 650 اننگز اور سری لنکا کے سابق کپتان کمار سنگاکارا نے 648 اننگز میں 27 ہزار بین الاقوامی رنز بنائے تھے۔
واضح رہے کہ کوہلی انٹرنیشنل کرکٹ میں تیزترین 25 ہزار اور 26 ہزار رنز مکمل کرنے والے بلے باز بھی ہیں۔
