وزیراعلیٰ سندھ مراد علی شاہ نے کہا ہے کہ ہمیں نیشنل فنانس کمیشن (این ایف سی) ایوارڈ پر تحفظات ہیں جو وفاق کے سامنے رکھ دیے ہیں۔
کراچی میں تقریب سے خطاب کرتے ہوئے مراد علی شاہ نے کہاکہ وفاق نے ہمیں یقین دہانی کرائی ہے کہ تحفظات دور کیے جائیں گے۔
یہ بھی پڑھیں آئی ایم ایف نے پاکستان سے این ایف سی ایوارڈ پر نظرثانی کاکیوں کہا؟
انہوں نے کہاکہ کے الیکٹرک بورڈ میں سندھ حکومت کی نمائندگی کے لیے وزیراعظم شہباز شریف سے بات کروں گا۔
وزیراعلیٰ سندھ نے کہاکہ پی ٹی آئی نے اپنے دور حکومت میں معیشت سے کھیل کھیلا، ہمیں 2 سال ملک کو سنبھالنے میں لگ گئے۔ تحریک انصاف کی حکومت نے جو غلط فیصلے کیے انہیں ٹھیک کرنے میں وقت تو لگے گا، تاہم اب ملک معاشی مسائل سے نکلنے جارہا ہے۔
مراد علی شاہ نے کہاکہ یہ کہنا درست نہیں کہ آئینی عدالتیں کسی ایک شخص کے لیے بنائی جارہی ہیں، کیونکہ ہمارے منشور میں بھی آئینی عدالتوں کا قیام شامل ہے۔
وزیراعلیٰ نے کہاکہ لوگوں تک اصل حقائق پہنچانے کی ذمہ داری میڈیا پر عائد ہوتی ہے، ماضی میں صحافت کا اسٹینڈرڈ بہت ہائی تھا، لیکن اب جس کے پاس موبائل ہے وہی خود کو صحافی کہتا ہے۔
یہ بھی پڑھیں این ایف سی ایوارڈ: وفاق کی صوبوں کو 42 کھرب سے زائد کے فنڈز کی فراہمی
سید مراد علی شاہ نے کہاکہ ہم صحافت کو ریاست کا چوتھا ستون سمجھتے ہیں لیکن اس کے غلط استعمال سے نقصانات ہوتے ہیں۔
