کراچی پولیس نے منشیات کی اسمگلنگ کی کوشش ناکام بناتے ہوئے 3 خواتین کو گرفتار کرلیا ہے۔
ڈی آئی جی ساؤتھ کے مطابق، ساؤتھ زون پولیس نے بلوچستان سے کراچی منشیات کی ترسیل کی کوشش ناکام بناتے ہوئے بین الصوبائی منشیات اسمگلنگ میں ملوث 3 خواتین کو گرفتار کیا جن سے ڈھائی کلو منشیات برآمد ہوئی۔
یہ بھی پرھیں: منشیات اسمگلنگ میں ملوث این جی او بے نقاب، سرغنہ سمیت 3 ملزمان گرفتار
انہوں نے پولیس کارروائی کی تفصیلات بتاتے ہوئے کہا کہ موچکو پولیس نے خفیہ اطلاع پر کارروائی کی، گرفتار کی گئی خواتین کے قبضے سے 1030 گرام افیون ، 1210 گرام چرس اور 255 گرام آئس برآمد کی گئی۔
ڈی آئی جی ساؤتھ نے کہا کہ گرفتار خواتین کی شناخت گنج خاتون زوجہ بھائی خان، مریم زوجہ قادر بخش جبکہ تیسری خاتون اقرا زوجہ عامر کے ناموں سے ہوئی ہیں، تینوں خواتین مسافر بس کے ذریعے کراچی منشیات منتقل کررہی تھیں۔
انہوں نے کہا کہ گرفتار خواتین کے خلاف اینٹی نارکوٹکس ایکٹ کے تحت مقدمہ درج کر کے مزید تفتیش کی جاری ہے۔
