پاکستان تحریک انصاف نے اپنے اراکین قومی اسمبلی و سینیٹ کو کسی بھی اجتماع یا مظاہرے میں شرکت سے روک دیا اور پابندی عائد کردی ہے۔
چیئرمین پاکستان تحریک انصاف نے اراکین قومی اسمبلی اور سینیٹ کے لیے ایک بار پھر سرکلر جاری کردیا۔
یہ بھی پڑھیں مجوزہ آئینی ترامیم: پی ٹی آئی کا پارلیمنٹ کی کارروائی کے بائیکاٹ کا اعلان
سرکلر میں کہا گیا ہے کہ کوئی رکن قومی اسمبلی و سینیٹ کسی اجتماع، مظاہرے، ریلی اور احتجاج میں تاحکم ثانی شرکت نہ کرے۔
واضح رہے کہ پی ٹی آئی کو خدشہ ہے کہ حکومت آئینی ترمیم کے لیے اپنے نمبر پورے کرنے کی خاطر ان کے اراکین کے ساتھ زور زبردستی کرسکتی ہے۔
آج ایک نجی ٹی وی کے پروگرام میں گفتگو کرتے ہوئے چیئرمین پی ٹی آئی بیرسٹر گوہر نے کہاکہ حکومت کو ہمارے اراکین ہاتھ نہیں آئیں گے۔
یہ بھی پڑھیں آئینی ترامیم کے لیے حکومت کے اپنے لوگ ووٹ نہیں دیں گے، بیرسٹر گوہر کا دعویٰ
انہوں نے کہاکہ جب آئینی ترمیم پیش ہوگی تو حکومت کے اپنے اراکین اس کے حق میں ووٹ نہیں دیں گے۔ ’پنجاب اور خیبرپختونخوا سے تعلق رکھنے والے اراکین اسمبلی کا موقف ہے کہ وہ اپنے ضمیر کے مطابق ووٹ دیں گے‘۔
