کینیڈا کی وزیر خارجہ میلانیا جولی نے کہا ہے کہ بھارتی سفارتکار اور ایجنٹس کینیڈا میں مجرمانہ کارروائیوں میں ملوث ہیں، نئی دہلی نے کینیڈا میں جرائم پیشہ افراد کو پرتشدد کارروائیوں کے لیے استعمال کیا ہے۔
کینیڈا کی وزیر خارجہ میلانیا جولی نے اپنے ملک میں بھارت کے سفارت کاروں کو متنبہ کیا ہے کہ کینیڈا اپنی سرزمین پر مزید کسی مجرمانہ سرگرمی کو برداشت نہیں کرے گا۔
یہ بھی پڑھیں: کینیڈا: سکھ رہنما ہردیپ سنگھ نجر کے قتل کے الزام میں 3 بھارتی شہری گرفتار
کشمیر میڈیا سروس کے مطابق یہ انتباہ رواں ہفتے کے شروع میں 6 بھارتی سفارت کاروں کی ملک بدری کے بعد جاری کیا گیا ہے جب کینیڈا کی پولیس نے کہا تھا کہ نئی دہلی کے حکم پر کینیڈا میں بھارتی ایجنٹوں کے ہاتھوں قتل اور بھتہ خوری کے کافی ثبوت موجود ہیں۔
میلانیا جولی نے کہا کہ شواہد سے پتا چلتا ہے کہ نئی دہلی نے کینیڈا میں جرائم پیشہ افراد کو پرتشدد کارروائیوں کے لیے استعمال کیا ہے جن میں بھارت میں سکھ ریاست قائم کرنے کے خواہشمند سکھ رہنمائوں کو نشانہ بنانا بھی شامل ہے۔
میلانیاجولی نے نیوز کانفرنس میں کہا کہ بھارتی سفارتکار یقینی طور پر ایک خطرہ تھے اور اسی وجہ سے رائل کینیڈین مائونٹڈ پولیس نے اس حقیقت کو عام کرنے کا غیر معمولی اقدام اٹھایا کہ کینیڈین شہریوں کو ڈرایا دھمکایا جا رہا ہے، بھتہ خوری کا نشانہ بنایا جا رہا ہے یا انہیں قتل کی دھمکیاں دی جا رہی ہیں کیونکہ بھارتی ایجنٹ اور سفارت کار ان مجرمانہ کارروائیوں میں ملوث ہیں۔
یہ بھی پڑھیں: کینیڈا اور انڈیا کے سفارتی تنازع میں بھارتی وزیر داخلہ امیت شاہ کا نام کیوں آیا؟
یاد رہے کہ کینیڈا کے علاقے برٹش کولمبیا میں گزشتہ سال سکھ رہنما ہردیپ سنگھ نجر کو قتل کردیا گیا تھا، تحقیقات میں ان کے قتل میں بھارت کے ایجنٹوں کے ملوث ہونے کے ثبوت سامنے آئے تھے، جس کے بعد بھارتی ہائی کمشنر کو کینیڈا سے نکال باہر کیا گیا تھا۔
کینیڈا کے وزیراعظم جسٹن ٹروڈو نے کہا تھا کہ اس قتل میں بھارت ملوث ہے جس کے بعد دونوں ملکوں کے درمیان سفارتی تنازع بڑھ گیا تھا تاہم، دہلی نے الزام کی تردید کی تھی۔
مقامی میڈیا رپورٹس کے مطابق گزشتہ روز کینیڈا میں گرفتاریوں کا اعلان کرتے ہوئے سپرنٹنڈنٹ مندیپ موکر نے کہا کہ تینوں مشتبہ افراد کی شناخت 22 سالہ کرن برار، 22 سالہ کمل پریت سنگھ اور 28 سالہ کرن پریت سنگھ کے طور پر کی گئی ہے اور ان پر قتل اور اقدام قتل کا الزام عائد کیا گیا ہے۔ تینوں افراد ایڈمنٹن، البرٹا میں رہ رہے تھے جہاں سے انہیں گرفتار کیا گیا۔
یہ بھی پڑھیں: سکھ رہنما کے قتل سے متعلق نئے حقائق، کینیڈا نے بھارتی ہائی کمشنر کو ملک بدر کردیا
حال ہی میں کینیڈا نے 6 بھارتی سفارتکاروں کو بھی ناپسندیدہ قرار دے کر ملک بدر کیا ہے۔
