کینیڈا نے سکھ رہنما ہردیپ سنگھ نجر کے قتل سے متعلق نئے حقائق سامنے آنے پر بھارتی ہائی کمشنر سنجے کمار ورما سمیت بھارت کے 6 سفارتی اہلکاروں کو ملک بدر کردیا ہے۔
کینیڈا میں پرتشدد بھارتی سرگرمیوں کے حوالے سے پولیس کی طرف سے نئی تفصیلات سامنے آنے کے بعد کینیڈا کی حکومت نے بڑا قدم اٹھاتے ہوئے بھارتی ہائی کمشنر سنجے کمار ورما کو ملک بدر کردیا ہے، سنجے کمار ورما سمیت 6 دیگر بھارتی اہلکار بھی ملک بدر کیے گئے ہیں۔
یہ بھی پڑھیں: کینیڈا: سکھ رہنما ہردیپ سنگھ نجر کے قتل کے الزام میں 3 بھارتی شہری گرفتار
بھارتی حکومت کی طرف سے علیحدگی پسند سکھوں کو نشانہ بنانے کے حوالے سے کینیڈا پہلے بھی بھارت کو انتباہ کرچکا تھا،6 سفارتکاروں کی بے دخلی کے اطلاع پر بھارت نے انہیں واپس دہلی بلوا لیا ہے۔
ذرائع کے مطابق کینیڈا کی پولیس کو بھارت کے سکھ رہنما ہردیپ سنگھ نجر کے قتل میں بھارتی سفارتخانے کے 6 اہلکاروں کے ملوث ہونے کے ٹھوس شواہد مل گئے تھے،سکھ فار جسٹس کے جنرل کونسل گرپتونت سنگھ پنوں بھارتی قتل کی سازش سے بال بال بچے تھے۔
یہ بھی پڑھیں: بھارت خالصتان تحریک کے رہنما ہردیپ سنگھ نجار سے متعلق دستاویزی فلم سے خوفزدہ
کینیڈا کی حکومت نے گزشتہ ہفتہ نئے شواہد سے متعلق بھارت کو آگاہ بھی کردیا تھا۔
یاد رہے کہ 45 سالہ ہردیپ سنگھ نجر کو جون 2023 میں کینیڈا کے علاقے وینکوور کے مضافاتی علاقے میں نقاب پوش بندوق برداروں نے گولی مار کر ہلاک کر دیا تھا۔
کینیڈا کے وزیراعظم جسٹن ٹروڈو نے کہا تھا کہ اس قتل میں بھارت ملوث ہے جس کے بعد دونوں ملکوں کے درمیان سفارتی تنازع بڑھ گیا تھا تاہم دہلی نے الزام کی تردید کی تھی۔
