کراچی میں نائن زیرو سے گرفتار ملزم عبید کے ٹو، کی رینجرز اہلکار کے قتل کیس میں سزا کے خلاف اپیل پر سماعت۔
نائن زیرو سے گرفتار ملزم عبید کے ٹو، کی رینجرز اہلکار کے قتل کیس میں سزا کے خلاف ہائیکورٹ میں اپیل پر سماعت ہوئی، عدالت نے مدعی مقدمہ کو نوٹس جاری کرتے ہوئے جواب طلب کرلیا۔
یہ بھی پڑھیں:ایم کیو ایم کی رکن قومی اسمبلی رعنا انصار کا بیٹا کار حادثے میں جاں بحق
دوران سماعت درخواست گزار کے وکیل نے مؤقف اپنایا کہ عبید کے ٹو کو 1998 کے مقدمے میں غیر موجودگی میں عمر قید کی سزا سنائی گئی تھی، ہماری اپیل پر عدالت عالیہ نے مقدمے کے دوبارہ ٹرائل کا حکم دیا۔
درخواست گزار کے وکیل کے مطابق دوبارہ ٹرائل میں بھی عدالت نے عبید کے ٹو کو عمر قید کی سزا سنائی ہے۔ دوبارہ ٹرائل انسداد دہشتگردی کی جن دفعات کے تحت ہوا وہ مقدمے کے اندراج کے بعد نافذ ہوئیں۔
درخواست گزار کے وکیل کا کہنا تھا کہ مقدمے کا اندراج 1998 میں ہوا جبکہ انسداد دہشتگردی ترمیمی ایکٹ 2001 میں نافذ ہوا۔
یہ بھی پڑھیں:ایم کیو ایم کارکن عبید کے ٹو کو 26 برس قبل کیے گئے قتل پر سزا سنادی گئی
وکیل کا کہنا تھا کہ عبید کے ٹو کی گرفتاری 2015 میں نائن زیرو سے کی گئی، لیکن مقدمے میں گرفتاری بعد میں ظاہر کی گئی ہے۔ لہٰذا ملزم کو ضابطہ فوجداری کی دفعہ 382 کا فائدہ تاریخ گرفتاری سے دیا جائے۔
عدالت نے درخواست کی سماعت تین ہفتوں کے لئے ملتوی کردی۔
واضح رہے کہ رواں برس اگست میں انسداد دہشت گردی عدالت نے متحدہ قومی موومنٹ سے تعلق رکھنے والے بدنام زمانہ ٹارگٹ کلر عبید عرف کے ٹو کو رینجرز اہلکار دلدار کے قتل کے جرم میں 40 برس قید کی سزا سنائی تھی۔
