وزیراعظم شہباز شریف نے صدر مملکت آصف علی زرداری کو دبئی میں ٹیلیفون کرکے پاؤں میں فریکچر پر ان کی خیریت دریافت کی ہے۔ وزیراعظم نے صدر مملکت کی جلد صحت یابی کے لیے نیک تمناؤں کا اظہار بھی کیا۔
گزشتہ شب دبئی ایئر پورٹ پر جہاز سے اترتے ہوئے صدر پاکستان آصف علی زرداری کے پاؤں میں فریکچر ہوگیا تھا۔ ایوان صدر کے مطابق صدر آصف علی زرداری کو فوری طور پر ابتدائی طبی امداد کے لیے اسپتال منتقل کیا گیا تھا۔
مزید پڑھیں:صدر آصف زرداری کا پاؤں فریکچر ہوگیا
ڈاکٹرز نے چیک اپ کے بعد اسپتال میں صدر آصف علی زرداری کے پاؤں پر 4 ہفتے کے لیے پلاسٹر کیا تھا، پھر انہیں اسپتال سے گھر منتقل کرتے ہوئے مکمل آرام کا مشورہ دیا تھا۔
خیال رہے کہ صدر مملکت آصف علی زرداری گزشتہ روز نجی دورے پر دبئی روانہ ہوئے تھے، انہیں دبئی میں 2 روز قیام کرنا تھا۔ صدر زرداری کی دبئی روانگی کے بعد چیئرمین سینیٹ یوسف رضا گیلانی نے قائم مقام صدر کا عہدہ سنبھال لیا ہے۔
