وزیر اعلیٰ خیبرپختونخوا علی امین گنڈاپور نے کہا کہ مولانا فضل الرحمان ہمیشہ اپنی بات سے مکرجاتے ہیں، فضل الرحمان اپنے قول و فعل میں تضاد نہ کریں۔
وزیر اعلیٰ خیبرپختونخوا علی امین گنڈاپور نے پشاور میں میڈیا سے بات چیت کرتے ہوئے کہا کہ جمیعت علما اسلام (ف) کے رہنما اپنے لیڈر مولانا فضل الرحمان کو سمجھائیں، کہ وہ اس عمر میں لالچ چھوڑ دیں۔
علی امین گنڈاپور کا کہنا تھا کہ آئینی ترمیم پر بھی پہلے کہا ووٹ نہیں دیں گے پھر ریٹ بڑھایا، ہر بار ہی اپنی بات سے مکر جاتے ہیں، آئندہ الیکشن میں مولانا فضل الرحمان کو خیبرپختونخوا سے ایک سیٹ بھی نہیں ملے گی۔
یہ بھی پڑھیں: وزیرِ اعلیٰ علی امین گنڈاپور نے خیبرپختونخوا میں طلبا یونین بحال کرنے کا اعلان کردیا
وزیر اعلیٰ کا کہنا تھا کہ اس بار پورا پاکستان بند کرنے کی تیاری ہورہی ہے۔ اس بار آئیں گے تو حکومت کا تختہ الٹ کرجائیں گے۔ ان کو نہیں چھوڑیں گے چاہے جو بھی ہوجائے۔
انہوں نے کہا کہ وفاقی حکومت سے کہتا ہوں تمہارے لوگ تھک چکے ہیں، حکومت تیار ہوجائے ہم ان کو نکالیں گے۔ اس بار پورا بندوبست کرکے آئیں گے اور یہ آخری ہوگا۔
مزید پڑھیں: ڈی چوک احتجاج: گرفتار سرکاری ملازمین کی رہائی پر بونس، پروموشن اور چھٹیوں کا وعدہ
خیال رہے اس سے قبل وزیرِ اعلیٰ علی امین گنڈاپور نے آج ڈی چوک اسلام آباد میں احتجاج کے دوران پکڑے گئے ریسکیو 1122 خیبر پختونخوا کے اہلکاروں کی رہائی کے بعد انہیں سی ایم ہاؤس بلایا ریسکیو اہلکاروں کا استقبال کیا، ان پر گل پاشی کی اور رہا ہونے والے ریسکیو اہلکاروں کو ون اسٹیپ پروموشن اور ایک ماہ کی تنخواہ دینے کا اعلان کیا۔
اس دوران انہوں نے میڈیا سے گفتگو کرتے ہوئے کہا کہ ہمارے 90فیصد کارکنان رہا ہوچکے ہیں، ان کارکنان نے بڑے عزم اور ہمت کا مظاہرہ کیا تھا۔
