وزیراعلیٰ پنجاب مریم نوازشریف نے بصارت سے محروم وی لاگر حافظ محمد علی کی خواہش کا احترام کرتے ہوئے اسے نئی گاڑی کا تحفہ دیا۔ وزیراعلیٰ نے حافظ محمد علی کو گاڑی کی چابی دی اور خود دروازہ کھول کر اسے گاڑی کی فرنٹ سیٹ پر بٹھایا۔
ترجمان وزراعلیٰ ہاؤس کے مطابق وزیراعلیٰ پنجاب مریم نوازشریف نے حافظ محمد علی سے پوچھا کہ آپ خوش ہیں ناں۔ اس پر محمد علی نے کہا کہ جی بہت خوش ہوں۔
حافظ محمد علی نابینا کرکٹر اور نعت گو بھی ہیں، وہ گوگل پر کرکٹ کے بارے میں ماہرانہ تبصرے بھی پیش کرتے ہیں۔ محمد علی نے قرآن مجید حفظ کرنے کے بعد اپنے شوق اور لگن سے اردو اور انگلش زبان میں مہارت حاصل کی۔ وہ گوگل اسسٹنٹ کی مدد سے موبائل فون استعمال کرتے ہیں۔
مزید پڑھیں:ایئر پنجاب، مریم نواز کی تجویز پر نواز شریف کی بھی حمایت
حافظ محمد علی کے والد کراچی میں ڈرائیور کی پرائیویٹ جاب کرتے تھے، والد سے دور رہنے کی وجہ سے حافظ محمد علی اداس رہتے تھے۔ انہوں نے چند ہفتے قبل وزیراعلیٰ مریم نوازشریف سے ملاقات میں گاڑی کی خواہش کا اظہار کیا تھا۔
حافظ محمد علی نے گاڑی ملنے پر خوشی کا اظہار کیا اور وزیراعلیٰ مریم نواز شریف کا شکریہ ادا کرتے ہوئے کہا وزیراعلیٰ مریم نوازشریف واقعی ماں کے جیسی ہیں، اتنا احساس تو کوئی ماں ہی کرسکتی ہے۔ مجھے دوسروں کی حقیقت کا پتا ہے، اس لیے روز اول سے ہی پاکستان مسلم لیگ (ن) کا سپورٹر ہوں۔
