وزیراعظم شہباز شریف آج سعودی عرب کے دارالحکومت ریاض میں عرب اسلامک ممالک کے غیرمعمولی سربراہی اجلاس میں شرکت کریں گے۔
وزیراعظم آفس کے میڈیا ونگ سے جاری بیان کے مطابق، وزیراعظم شہباز شریف اجلاس سے خطاب میں غزہ اور فلسطین کے دیگر علاقوں میں اسرائیل کی ظالمانہ کارروائیوں پر پاکستان کا مؤقف پیش کریں گے۔ عرب اسلامک سمٹ کے موقع پر وزیراعظم کی سعودی عرب کے وزیر سرمایہ کاری اور مسلم ورلڈ لیگ کے سیکریٹری جنرل سے ملاقاتیں بھی متوقع ہیں۔
یہ بھی پڑھیں: وزیراعظم شہباز شریف عرب اسلامک سربراہ کانفرنس میں شرکت کے لیے سعودی عرب پہنچ گئے
سربراہ اجلاس میں شرکت کے لیے وزیراعظم گزشتہ روز سعودی عرب پہنچے تھے۔ وفاقی وزیر اطلاعات و نشریات عطااللہ تارڑ اور معاون خصوصی طارق فاطمی بھی دورہ سعودی عرب میں ان کے ہمراہ موجود ہیں۔ یہ غیر معمولی سربراہی اجلاس سعودی عرب کی حکومت کی جانب سے بلایا گیا ہے، جس میں غزہ اور فلسطین سمیت مشرق وسطیٰ کی صورتحال پر تبادلہ خیال کیا جائے گا۔ سربراہ اجلاس میں عرب لیگ اور او آئی سی کے رکن ممالک کے سربراہان مملکت و حکومت شرکت کررہے ہیں۔
شہبازشریف نے سماجی رابطے ایکس پراپنی پوسٹ میں لکھا کہ اجلاس میں غزہ میں تیزی سے بگڑتی صورتحال پرتبادلہ خیال کیاجائے گا اور فلسطینی عوام کے حقوق کے لئے ایک آواز ہوکر بات کریں گے اورعلاقائی امن کے لئے اجتماعی مطالبہ کااعادہ کریں گے۔
Landed in Riyadh where I will join the leaders of the Muslim Ummah at the Joint Arab Islamic Summit being convened to discuss the rapidly deteriorating situation in Gaza and speak with one voice for the rights of the Palestinian people and reaffirm our collective call for…
— Shehbaz Sharif (@CMShehbaz) November 10, 2024
وزیراعظم فلسطین کے نصب العین کے لیے پاکستان کی مکمل حمایت کا اعادہ کریں گے اور غزہ میں نسل کشی کے فوری خاتمے اورخطے میں اسرائیل کی جاری مہم جوئی کو فوری روکنے کا مطالبہ کریں گے۔
وزیراعظم شہباز شریف عالمی رہنمائوں کی 2 روزہ موسمیاتی کانفرنس میں شرکت کے لیے کل آذربائیجان کے دارالحکومت باکو کا بھی دورہ کریں گے جورہنماؤں کو اقوام متحدہ کی 29ویں موسمیاتی تبدیلی کانفرنس کے حصے کے طور پر منعقد ہورہی ہے۔
