بنگلہ دیش میں عبوری حکومت کے چیف ایڈوائزر ڈاکٹر محمد یونس کا کہنا ہے کہ بنگلہ دیش مفرور سابق وزیراعظم حسینہ واجد کی حوالگی کے لیے بھارت سے مطالبہ کرے گا۔
بنگلہ دیش میں عبوری حکومت کے 100 روز مکمل ہونے پر چیف ایڈوائزر محمد یونس نے قوم سے خطاب میں کہا کہ بنگلہ دیش ہنگاموں میں ہوئے ہر قتل کے لیے انصاف کو یقینی بنائیں گے اور بھارت سے معزول مطلق العنان شیخ حسینہ کو واپس بھیجنے کا بھی کہیں گے۔
محمد یونس نے کہا کہ عبوری حکومت حسینہ واجد کے خلاف مقدمہ چلائے گی۔ حسینہ واجد اور ان کے ساتھیوں کے خلاف مختلف مجرمانہ الزامات عائد کیے گئے ہیں۔ تحقیقات میں بغاوت میں ہونے والی ہلاکتوں اور انسانی حقوق کی تمام خلاف ورزیوں کا احاطہ کیا جائے گا۔ حسینہ واجد کے دور میں مبینہ طور پر جبری گمشدگیاں بھی شامل ہیں۔ حسینہ اور ان کے ساتھیوں کو گرفتار کرنے کے لیے انٹر پول کی مدد بھی لی جائے گی۔
مزید پڑھیں: بنگلہ دیش، حسینہ واجد کو امریکا سے کیا توقعات ہیں؟
محمد یونس نے یہ بھی کہا کہ ان کی حکومت کا بنیادی مقصد منتخب افراد کو اقتدار منتقل کرنے کے لیے نئے انتخابات کا انعقاد کرنا ہے۔ انہوں نے انتخابی نظام سمیت مختلف شعبوں میں اصلاحات کے نفاذ کا اشارہ بھی دیا۔ انہوں نے یقین دلایا کہ انتخابی اصلاحات مکمل ہونے کے بعد وہ نئے انتخابات کے ٹائم لائن کا اعلان کریں گے۔
محمد یونس نے اقلیتوں، خاص طور پر ہندوؤں پر حملوں سے متعلق خبروں کو مبالغہ آمیز قرار دیتے ہوئے مسترد کر دیا۔
واضح رہے کہ سابق بنگلہ دیشی وزیراعظم حسینہ واجد 5 اگست کو مستعفیٰ ہو کر بھارت فرار ہوگئی تھیں۔ حسینہ واجد نے متنازع کوٹا سسٹم کے خلاف طلبا کے ملک گیر احتجاج کے بعد استعفیٰ دیا تھا۔ ان کی حکومت کے خلاف احتجاج میں طلبا سمیت 1500 افراد ہلاک اور 19 ہزار سے زیادہ زخمی ہوئے تھے۔
