فیڈرل بورڈ آف ریونیو (ایف بی آر) نے وفاقی دارالحکومت اسلام آباد میں 2 مشہور ریسٹورنٹس کو سیل کردیا ہے۔
میڈیا رپورٹس کے مطابق، ریجنل ٹیکس آفس اسلام آباد نے دونوں ریسٹورنٹس کو شہریوں کی جانب سے شکایات موصول ہونے پر سیل کیا۔ شہریوں نے دونوں ریسٹورنٹس کی جانب سے جعلی رسیدیں جاری کیے جانے پر شکایات درج کرائی تھیں۔
یہ بھی پڑھیں: اسلام آباد میں جعلی رسیدیں جاری کرنے پر 2 ر یسٹورنٹس سیل
ایف بی آر کے مطابق، شہریوں کی جانب سے شکایات موصول ہونے کے بعد ڈپٹی کمشنر کی سربراہی میں آر ٹی او اسلام آباد کی ایک ٹیم نے ریسٹورنٹس کی مرکزی اور ذیلی برانچز پر چھاپے مارکر انہیں سیل کردیا جبکہ دونوں ریسٹورنٹس پر مجموعی طور پر 10 لاکھ روپے کا جرمانہ عائد کیا گیا۔
ایف بی آر نے کہا ہے کہ یہ اقدام حکومت کی جانب سے ریٹیلرز اور ریسٹورنٹس کو پی او ایس انوائسنگ سسٹم کے ذریعے ٹیکس نیٹ میں لانے کی کوششوں کا حصہ ہے اور ایف بی آر جعلی رسیدیں جاری کرنے کے غیرقانونی اقدامات کے خلاف پرعزم ہے۔
یہ بھی پڑھیں: سپریم کورٹ کا مونال سمیت نیشنل پارک میں قائم تمام ریسٹورنٹس بند کرنے کا حکم
واضح رہے کہ آر ٹی او اسلام آباد نے گزشتہ ماہ بھی وفاقی دارالحکومت میں 5 مشہور ریسٹورنٹس کو جعلی رسیدیں جاری کرنے پر سیل کردیا تھا۔
