بھارتی اداکارہ پریانکا چوپڑا نے پاکستانی نژاد کینیڈین شرمین عبید چنائے کو انسٹاگرام پر ایک پیغام دیا جس پر ناراضگی کا اظہار کرتے ہوئے پاکستانی اداکار عدنان صدیقی نے بھارتی اسٹار کو باتیں سنادیں۔
پریانکا چوپڑا نے شرمین عبید چنائے کی آنے والی فلم اسٹار وارزپر ان کی تعریف کی تاہم اس موقع پر انہوں نے شرمین کا تعارف پاکستانی کے بجائے جنوبی ایشیائی کے طور پر کروایا جس پر عدنان صدیقی برا مان گئے۔
عدنان صدیقی نے جمعہ کے روز ٹویٹر پر پریانکا چوپڑا کو ٹیگ کرتے ہوئے بھارتی اداکارہ کے الفاظ کے انتخاب پر برہمی کا اظہار کیا۔
انہوں نے اپنی پوسٹ میں لکھا کہ ’پریانکا انتہائی احترام کے ساتھ آپ کی اطلاع کے لیے عرض ہے کہ شرمین عبید چنائے ایک پاکستانی ہیں، بالکل اسی طرح جیسے آپ جب بھی موقع ملتا ہے جنوبی ایشیائی ہونے کا دعویٰ کرنے سے پہلے خود کو ایک ہندوستانی ظاہر کرتی ہیں‘۔
With due respect, @priyankachopra . Sharmeen Obaid Chinoy is a Pakistani first just to brush up your knowledge. Much like the way you flaunt your Indian nationality whenever you get the opportunity before claiming to be a South Asian.🙏🏽 pic.twitter.com/B7wy8gD8QB
— Adnan Siddiqui (@adnanactor) April 14, 2023
پریانکا نے حال ہی میں شرمین کو اپنے انسٹاگرام اسٹوریز پر مبارکباد دیتے ہوئے شرمین کے بارے میں لکھا تھا کہ پہلی خاتون جو اسٹار وارز فلم کی ہدایت کاری کررہی ہیں اور وہ جنوبی ایشیائی ہیں! کتنا تاریخی لمحہ ہے، شرمین مجھے آپ پر بیحد فخر ہے۔ آخر میں پریانکا نے شرمین کو ’میری دوست‘ کہتے ہوئے ان کے لیے دعایہ الفاظ بھی استعمال کیے۔
پریانکا کے علاوہ دیگر معروف شخصیات نے بھی فلم کے لیے شرمین کو مبارکباد کے پیغامات بھیجے جن میں کئی پاکستانی بھی شامل تھے۔ مہوش حیات نے لکھا کہ ’اور یہ بہت دور ایک کہکشاں میں شروع ہوتا ہے۔ ماہرہ خان نے کہا ’پاگل! اتنا اچھا، ماشاء اللہ مبارک ہو‘۔
دیگر بشمول وجاہت رؤف اور عدنان ملک نے بھی انسٹاگرام پر ڈائریکٹر شرمین عبید چنائے کی پوسٹ پر تبصرہ کیا۔ جہاں رؤف نے لکھا، ’مبارک ہو‘، عدنان نے کہا، ’آپ کیا (شاندار) سفر طے کرنے جا رہی ہیں۔
شرمین کی ہدایت کاری میں ڈیزی رڈلی اداکاری کریں گی جو اسٹار وارز میں رے کا کردار ادا نبھا رہی ہیں۔
