کئی رکاوٹوں کے باوجود پیراماؤنٹ اور وارنر برادرز ڈسکوری کا باضابطہ طور پر انضمام ہو گیا جو کارپوریٹ سیکٹر میں ایک بہت بڑا کارنامہ ہے اور 110 ارب ڈالر کی اس ڈیل کے ساتھ پیراماؤنٹ اسکائی ڈانس دنیا کی سب سے بڑی انٹرٹینمنٹ کمپنیوں میں سے ایک بن گئی ہے۔
یہ بھی پڑھیں: پیراماؤنٹ اور وارنر برادرز ڈسکوری کے اربوں ڈالر کے انضمام کو عدالتی حکم سے روک دیا گیا
انڈسٹری کو ہلا دینے والی اس ڈیل میں پیراماؤنٹ پکچرز، سی بی ایس، نکلوڈین، شو ٹائم، کامیڈی سینٹرل، وارنر برادرز، ایچ بی او، سی این این، ڈی سی اسٹوڈیوز، ڈسکوری اور فوڈ نیٹ ورک ایک ہی چھتری تلے آ رہے ہیں جو اسکائی ڈانس کارپوریشن ہے۔
اسکائی ڈانس کے بانی ڈیوڈ ایلیسن اس انضمام کے بعد سرفہرست آ گئے ہیں جو ہالی وڈ اور اس کے نتیجے میں میڈیا کے منظر نامے کو نئی شکل دینے کی پوزیشن میں ہیں۔
تاہم اس ٹیک اوور تک پہنچنے کا راستہ پیچیدگیوں سے بھرا رہا جن میں قانونی مسائل بھی شامل تھے۔
ناقدین کو خدشہ ہے کہ یہ انضمام طاقت کو چند ہاتھوں میں مرکوز کر سکتا ہے۔ اسے روکنے کے لیے کیلیفورنیا نے عدالت میں ڈیل کو چیلنج کرنے کے لیے ریاستوں کا اتحاد بنا لیا۔
تاہم دونوں فریقین نے گزشتہ ستمبر میں ایک سمجھوتے پر اتفاق کر لیا۔
مزید پڑھیے: نیٹ فلکس اور وارنر برادرز کا معاہدہ کھٹائی میں، صدر ٹرمپ درمیان میں کودپڑے
پھر بھی خدشات برقرار ہیں کیونکہ ڈیوڈ ایلیسن کے ٹرمپ انتظامیہ کے ساتھ پرجوش تعلقات ہیں جو انٹرٹینمنٹ انڈسٹری میں صدر کے سیاسی ناقدین کے لیے باعث تشویش ہیں۔
ان خدشات کو دور کرنے کے لیے ایگزیکٹو نے سوشل میڈیا پر ایک بیان شیئر کیا جس میں انہوں نے اپنی اس یقین دہانی کو دہرایا کہ وہ پیراماؤنٹ اور وارنر برادرز دونوں کی الگ الگ میراث کو برقرار رکھیں گے۔
انہوں نے کہا کہ ہم کبھی نہیں چاہتے تھے کہ ایک نئی کارپوریٹ شناخت ان میں سے کسی ایک کو کم کرے، بدلے یا اس پر سایہ ڈالے۔
ڈیوڈ ایلیسن نے مزید کہا کہ اس کے بجائے ہم ایک ایسا نام چاہتے تھے جو مشترکہ کمپنی کو اپنی ایک الگ شناخت دے جبکہ پیراماؤنٹ اور وارنر برادرز اور ہمارے تمام غیر معمولی برانڈز کو اسپاٹ لائٹ میں رہنے دے۔
مزید پڑھیں: نیٹ فلکس کا وارنر برادرز ڈسکوری کو 83 ارب ڈالر میں خریدنے کا فیصلہ
قابل ذکر ہے کہ پیراماؤنٹ نے پہلی بار ستمبر 2025 میں وارنر برادرز ڈسکوری کے ٹیک اوور کے ارادے کا اظہار کیا تھا۔
