وزیر اعلیٰ پنجاب مریم نواز شریف سے سعودی عرب کے صوبہ حفر الباطن کے سابق گورنر شہزادہ منصور نے ملاقات کی ہے۔
ملاقات میں دو طرفہ تعلقات اور باہمی تعاون پر تفصیلی تبادلہ خیال کیا گیا۔
اس ملاقات میں وزیراعلیٰ مریم نواز اور شہزادہ مںصور کے درمیان پنجاب میں سرمایہ کاری کے مواقع پر بھی گفتگو ہوئی۔ وزیر اعلیٰ نے انفراسٹرکچر، صحت، تعلیم اور مذہبی سیاحت کے شعبوں میں سعودی سرمایہ کاری کو دعوت دیتے ہوئے کہا کہ صوبے میں سعودی سرمایہ کاروں کو سپیشل پیکج کے تحت مراعات دی جائیں گی۔
یہ بھی پڑھیے:سعودی وزارت اسلامی امور اور پاکستانی وزارت مذہبی امور کے درمیان معاہدہ
وزیر اعلیٰ مریم نواز نے سعودی عرب کی جانب سے پاکستان کے لیے ہمیشہ برادرانہ تعاون کو سراہا اور کہا کہ سعودی عرب بڑا بھائی ہے اور دونوں ممالک کے عوام کے دل ایک ساتھ دھڑکتے ہیں۔
ان کا کہنا تھا کہ پنجاب حکومت نے کاروباری ماحول کو بہتر بنانے کے لیے سیکیورٹی اور میرٹ کو یقینی بنایا ہے۔
اس موقع پر سابق گورنر شہزادہ منصور نے کہا کہ پاکستان اور سعودی عرب کے تعلقات خطے کے استحکام اور ترقی کے لیے نہایت اہم ہیں۔ انہوں نے اس عزم کا اعادہ کیا کہ سعودی عرب ہمیشہ پاکستان کے ساتھ کھڑا رہے گا۔
