حال ہی میں واشنگٹن میں ’فرسٹ پاکستان گلوبل‘ نامی تنظیم کی جانب سے 22 جنوری کو کیپیٹل ہل میں اسلام آباد قتل عام کے موضوع پر ایک کانگریشنل بریفنگ کی میزبانی کی گئی۔ تنظیم کے ٹوئیٹ کے مطابق اس بریفنگ کا انتظام کانگریس مین گریگ کاسار اور پاکستانی امریکی کمیونٹی نے کیا تھا۔
اس تقریب میں صرف 3 کانگریس ممبران نے شرکت کی۔ تنظیم کے مطابق یہ بریفنگ فاشسٹ حکومت کے مظالم کو بے نقاب کرنے اور انسانیت کے خلاف جرائم کے لیے احتساب اور انصاف کی اشد ضرورت کو اجاگر کرنے کے لیے تھی۔ تاہم، بریفنگ اپنے مقصد میں کامیاب نہ ہو سکی۔
مزید پڑھیں: سیاسی ڈائیلاگ میں ڈیڈلاک، پی ٹی آئی نے مذاکرات کے چوتھے راؤنڈ میں شرکت سے انکار کردیا
کچھ پاکستانیوں نے جنہیں یہ بریفنگ پاکستان کے خلاف سمجھا، جب اس میں شرکت کرنے اور بیٹھنے کی کوشش کی، تو انہیں پولیس کے ذریعے باہر نکال دیا گیا۔ بریفنگ کے دوران پی ٹی آئی کے رہنماؤں کی شرکت نہ ہونے کے برابر تھی۔ تقریب کے آغاز سے قبل ہال میں ہنگامہ آرائی بھی ہوئی، جس کے نتیجے میں انتظامیہ اور کچھ افراد کے درمیان سخت جملوں کا تبادلہ ہوا۔ پولیس کی مداخلت کے بعد ان افراد کو باہر نکالا گیا۔
انتظامیہ کا کہنا تھا کہ اس بریفنگ میں شرکت صرف دعوت نامہ کے ذریعے ممکن تھی، اور جو لوگ مدعو نہیں تھے انہیں اجازت نہیں دی جا سکتی تھی۔
