اسلام آباد کے تجارتی مراکز میں عوامی سہولت کے لیے پولیس ہیلپ ڈیسک قائم کردیے گئے ہیں۔
ترجمان اسلام آباد پولیس کے مطابق آئی جی اسلام آباد سید علی ناصر رضوی کی ہدایت پر شہریوں کی رہنمائی اور فوری امداد کے لیے تجارتی مراکزمیں ’پولیس ہیلپ ڈیسک‘ قائم کردیے گئے ہیں۔
یہ بھی پڑھیں: وزیر داخلہ کی چینی ہم منصب سے ملاقات، بیجنگ پولیس اور اسلام آباد پولیس میں تعاون بڑھانے کا فیصلہ
اسلام آباد کے تمام تھانہ جات کی حدود میں 26 ’پولیس ہیلپ ڈیسک‘ کا قیام عمل میں لایا گیا ہے، ہیلپ ڈیسک پر افسران و جوانوں کو تعینات کیا گیا ہے۔
آئی جی اسلام آباد سید علی ناصر رضوی کے احکامات پر شہریوں کی سہولت کے پیش نظر مختلف مقامات پر پولیس ہیلپ ڈیسک قائم کر دیے گئے۔
مارکیٹوں میں عوام کی فوری مدد کے لیے قائم ان ہیلپ ڈیسک پر تعینات پولیس افسران چوبیس گھنٹے شہریوں کی معاونت اور راہنمائی کے لیے موجود رہیں گے۔… pic.twitter.com/FAmJo6IydO
— Islamabad Police (@ICT_Police) March 17, 2025
ہیلپ ڈیسک پر خواتین کو درپیش مشکلات کے حل کے لیے لیڈی پولیس افسران تعینات کی گئی ہیں، ہیلپ ڈیسک بھکاریوں کے خلاف کارروائیاں کرنے میں بھی مدد فراہم کریں گے۔
ترجمان کے مطابق شہری ان ڈیسک پرمعلومات سمیت ایمرجنسی میں پولیس کی فوری مدد حاصل کر سکیں گے، ہیلپ ڈیسک کے قیام کا مقصد شہریوں کو ہر قسم کی سہولت مہیا کرنا ہے ۔
یہ بھی پڑھیں: شہریوں کے لیے بڑا ریلیف، اسلام آباد پولیس کی مصالحتی کمیٹیاں ازسرنو فعال
یہ ڈیسک تجارتی مراکز میں شہریوں کی آمدورفت سمیت تجارتی سرگرمیوں کو فروغ دیں گے۔
آئی جی اسلام آباد سید علی ناصر رضوی کا کہنا ہے کہ پولیس کی موجودگی سے شہریوں کو تجارتی مراکز میں تحفظ کا احساس ہوگا،شہریوں کی جان و مال کا تحفظ پولیس کی اولین ترجیح ہے۔
