وزیراعظم شہباز شریف سے چیئرمین بلوچستان نیشنل پارٹی سردار اختر مینگل نے ملاقات کی ہے۔
وزیراعظم ہاؤس میں ہونے والی ملاقات میں سردار اختر مینگل نے وزیرِ اعظم کو بلوچستان کے عوام اور منتخب نمائندوں کی جانب سے ملکی بقا اور بلوچستان کی ترقی کے لیے اقدامات پر مکمل اعتماد کا اظہار کیا۔
اس موقع پر وزیراعظم شہباز شریف نے کہا کہ پاکستان کی ترقی بلوچستان کی ترقی سے مشروط ہے۔ باصلاحیت بلوچ نوجوان پاکستان کا قیمتی اثاثہ ہیں جن کی ترقی حکومت کی اولین ترجیح ہے۔
شہباز شریف کا کہنا تھا کہ گوادر بندرگاہ کی ترقی کے ساتھ ساتھ گوادر کے مقامی لوگوں کو بین الاقوامی معیار کی شہری سہولیات کے لیے دن رات کوشاں ہوں
ملاقات کے دوران سردار اختر مینگل نے کہا کہ پاکستان کی تاریخ میں پہلی مرتبہ وزیرِ اعظم شہباز شریف نے بلوچستان کے نوجوانوں کی ترقی اور خوشحالی کو اپنی اولین ترجیح بنایا۔
اختر مینگل کا کہنا تھا کہ سیلاب کے دوران وزیرِ اعظم نے بلوچستان کے علاقوں کا خود دورہ کرکے متاثرہ بلوچوں کا درد بانٹا جو آج سے پہلے کبھی نہیں ہوا۔
انہوں نے کہا کہ وزیرِ اعظم شہباز شریف نے گزشتہ ایک برس میں ملک میں شدید معاشی مشکلات اور قدرتی آفات کے باوجود ملکی معیشت کو مستحکم کیا۔
