عید قرباں کے قریب آتے ہی جہاں ہرطرف قربانی کے جانوروں کی گہما گہمی ہوتی ہے وہیں سوشل میڈیا پر دلچسپ خبریں وائرل ہو جاتی ہیں۔ کبھی گائے کی چہل قدمی اور پان کھانے کی ویڈیو وائرل ہوتی ہے تو کبھی رکشے میں بیٹھے اونٹ کی۔
حال ہی میں سوشل میڈیا پر ایسی ہی دلچسپ ویڈیو وائرل ہو رہی ہے جس میں ایک بکرا موٹر سائیکل کی سواری کرتے ہوئے نظر آ رہا ہے۔ ویڈیو میں دیکھا جا سکتا ہے کہ موٹر سائیکل سوار بکرے کو آگے بٹھائے ہوئے جا رہا ہے اور اس دوران بکرا پر سکون طریقے سے بیٹھا ہوا اس سواری سے لطف اندوز ہو رہا ہے۔
ویڈیو وائرل ہوئی تو سوشل میڈیا پر صارفین کی جانب سے ویڈیو پر ملے جلے تبصرے کیے گئے۔ کچھ صارفین نے اس عمل کی مذمت کی تو کوئی یہ کہتا نظر آیا کہ بکرے کو موٹر سائیکل پر مزے آ رہے ہیں۔
ایک صارف کا ویڈیو شیئر کرتے ہوئے کہنا تھا کہ پاکستان میں کچھ بھی ممکن ہے۔ حسن زبیر لکھتے ہیں کہ موٹر سائیکل سوار نے بکری کا بچہ بٹھایا ہوا ہے یا اس کا اپنا بچہ ہے جبکہ ایک صارف نے مزاحیہ انداز اپناتے ہوئے کہا کہ یہ نیا شادی شدہ جوڑا کیوں لگ رہا ہے۔
سید جعفری نے اس عمل پر تنقید کرتے ہوئے کہا کہ بکرے کو اذیت کیوں دے رہے ہیں جبکہ دوسرے سوشل میڈیا صارف کا کہنا تھا کہ بکرا موٹر سائیکل سواری سے لطف اندوز ہو رہا ہے اور مزے سے گھوم رہا ہے۔
واضح رہے کہ گزشتہ سال بھی ایسی ہی ایک ویڈیو سوشل میڈیا پر وائرل ہوئی تھی جس میں ایک موٹر سائیکل سوار نہایت مہارت کے ساتھ تین بکروں کو موٹر سائیکل کی سواری کرواتا نظر آیا، اور بکرے بھی اِرد گرد کے مناظر سے لطف اندوز ہوتے دکھائی دیے تھے۔
