بھارتی جارحیت اور خطے میں بڑھتی ہوئی کشیدگی کے تناظر میں محکمہ داخلہ پنجاب نے صوبے بھر کے اسپتالوں میں فوری طور پر ایمرجنسی نافذ کرنے کی ہدایات جاری کر دی ہیں۔
محکمہ داخلہ کے ترجمان کے مطابق، اسپیشلائزڈ ہیلتھ کیئر اینڈ میڈیکل ایجوکیشن ڈیپارٹمنٹ اور محکمہ صحت و آبادی پنجاب کو باضابطہ مراسلہ جاری کیا گیا ہے جس میں ایمرجنسی ہیلتھ الرٹ نافذ کرنے کی سفارش کی گئی ہے۔
مزید پڑھیں: بھارت کا غرور فضاؤں میں راکھ ہوگیا، مریم نواز کا پاک فضائیہ کو خراجِ تحسین
مراسلے میں کہا گیا ہے کہ بھارتی حملے کے ممکنہ مضمرات کے پیش نظر شعبہ صحت کی فوری اور مؤثر خدمات نہایت اہمیت کی حامل ہیں، لہٰذا تمام اسپتالوں میں ایمرجنسی رسپانس پروٹوکولز کو مکمل طور پر فعال کیا جائے۔
محکمہ داخلہ نے ہدایت کی ہے کہ اسپتالوں میں ڈاکٹرز، نرسز، پیرامیڈیکل اسٹاف اور معاون عملہ مناسب تعداد میں ہر وقت موجود رہے، طبی سامان، ایمرجنسی کٹس اور خون کے ذخائر کی فوری دستیابی یقینی بنائی جائے۔
مزید برآں، ایمرجنسی صورتحال میں ریسکیو اور دیگر ایمرجنسی سروسز کے ساتھ مؤثر رابطہ اور ہم آہنگی برقرار رکھنے پر بھی زور دیا گیا ہے۔ مراسلہ محکمہ داخلہ پنجاب کے انٹرنل سیکیورٹی وِنگ کی جانب سے جاری کیا گیا ہے۔
