نگراں وزیر اعلیٰ پنجاب محسن نقوی بدھ کو سینیئر سیاستدان و مسلم لیگ قائداعظم کے سربراہ چودھری شجاعت حسین سے ان کی رہائش گاہ پر ملاقات کی اور ان کے گھر پر پیش آئے ایک ناخوشگوار واقعے پر افسوس کا اظہار کرتے ہوئے متعلقہ حکام کو اس کی انکوائری کا بھی حکم جاری کیا۔
واضح رہے کہ 28 اپریل کو لاہور میں محکمہ اینٹی کرپشن اور پولیس حکام نے صدر پاکستان تحریک انصاف چوہدری پرویز الہٰی کی گرفتاری کے لیے ان کی رہائش گاہ پر رات گئے چھاپہ مارا تھا۔ پولیس اہلکار جب گھر کی تلاشی کے باوجود پرویز الہٰی کو نہ ڈھونڈ سکے تھے تو انہوں نے پڑوس میں ہی واقع چوہدری شجاعت حسین کی رہائش گاہ میں بھی زبردستی داخل ہونے کی کوشش کی تھی تاہم ان کے بیٹوں کی جانب سے پولیس کو مزاحمت کا سامنا کرنا پڑا۔ اس دوران چودھری شجاعت حسین کے صاحبزادے وفاقی وزیر سالک حسین بھی زخمی ہوگئے تھے۔
محسن نقوی سالک حسین کی خیریت دریافت کی اور ان کے علاوہ ان کے بھائی شافع حسین سے بھی اس واقعے کے بارے میں تفصیلات حاصل کیں۔ نگران وزیر اعلیٰ پنجاب محسن نقوی کے ہمراہ چیف سیکریٹری، انسپکٹر جنرل پولیس اور سی سی پی او لاہور بھی موجود تھے۔
اس موقع پر گفتگو کرتے ہوئے نگراں وزیر اعلیٰ نے کہا کہ وہ اس افسوسناک واقعہ پر معذرت خواہ ہیں۔ انہوں نے بتایا کہ وہ عمرے کی ادائیگی کے لیے سعودی عرب میں تھے اور آج صبح ہی لاہور واپس پہنچے ہیں۔
محسن نقوی کا کہنا تھا کہ تحقیقات میں ذمہ داران کا تعین ہو گا اور بلاامتیاز کارروائی کی جائے گی کیوں کہ قانون سب کے لیے برابر ہے۔
چودھری شجاعت حسین نے رہائش گاہ آمد پر نگراں وزیر اعلیٰ کا شکریہ ادا کیا-
