چیئرمین پی ٹی اے باچا خان مرکز پہنچ گئے، ایمل ولی کے ساتھ کدورتیں ختم

پاکستان ٹیلی کمیونیکیشن اتھارٹی (پی ٹی اے) کے چیئرمین میجر جنرل (ر) حفیظ الرحمان ایمل ولی خان سے تلخ کلامی پر معذرت کے لیے باچا خان مرکز پہنچ گئے، جس کے بعد تمام کدورتیں ختم ہوگئیں۔

یہ بھی پڑھیں چیئرمین پی ٹی اے نے ایمل ولی سے چرس بھرا سیگریٹ مانگ لیا، اجلاس میں جھڑپ

چیئرمین پی ٹی اے میجر جنرل (ر) حفیظ الرحمان باقاعدہ جرگہ لے کر باچا خان مرکز پہنچے۔ اے این پی کے سربراہ ایمل ولی خان نے چیئرمین پی ٹی اے کا استقبال کیا۔

واضح رہے کہ اے این پی سربراہ ایمل ولی خان اور چیئرمین پی ٹی اے کے درمیان سینیٹ کمیٹی اجلاس میں تلخ کلامی ہوئی تھی۔

اجلاس کے دوران چیئرمین پی ٹی اے نے ایمل ولی خان پر چرس پینے کا الزام لگایا جس پر اے این پی رہنما نے شدید احتجاج کیا۔

ایمل ولی خان کے احتجاج پر بعد ازاں چیئرمین پی ٹی اے کو اجلاس چھوڑ کر جانا پڑا تھا، اور معذرت بھی کی تھی، تاہم ایمل ولی نے معذرت قبول کرنے سے انکار کیا تھا۔

سب کدورتیں ختم ہوگئیں، تحریک استحقاق واپس لوں گا، ایمل ولی

بعد ازاں گفتگو کرتے ہوئے ایمل ولی خان نے کہاکہ چیئرمین پی ٹی اے خود یہاں پر آئے جو بڑی بات ہے، یہ محض ایک حادثہ تھا، پشتون تو سر کے دشمن کو بھی معاف کر دیتے ہیں۔

یہ بھی پڑھیں وضاحت مسترد، ایمل ولی نے چیئرمین پی ٹی اے کیخلاف تحریک استحقاق پیش کردی

انہوں نے کہاکہ سب کدورتیں ختم ہوگئی ہیں، اب میں چیئرمین پی ٹی اے کے خلاف تحریک استحقاق واپس لے لوں گا، باچا خان مرکز پشتونوں کا گھر ہے، ہم یہاں آمد پر انہیں خوش آمدید کہتے ہیں۔