10 جون کو وفاقی حکومت کی جانب مالی سال 2025۔26 کا بجٹ پیش کیے جانے کا امکان ہیں۔ جس پر قریباً ہر فرد کی نظر ہے۔ اس وقت ہر خاص و عام شخص کی دلچسپی ہے کہ بجٹ میں کیا مہنگا ہونے جا رہا ہے اور کن چیزوں کی قیمتوں میں کمی کا امکان ہے؟
پاکستانی عوام کی ایک بڑی تعداد ایسی بھی ہے جو ہمیشہ موٹر بائیکس اور گاڑیوں کی قیمتوں کے حوالے سے جاننا چاہتے ہیں۔ پاکستان میں خاص طور پر گاڑیوں کی قیمتیں گزشتہ چند برس سے بہت زیادہ بڑھ چکی ہیں۔ جس کے باعث گاڑی خریدنا نہایت مشکل ہو چکا ہے۔ اب دیکھنا یہ ہے کہ بجٹ میں عوام کو گاڑیوں اور موٹر بائیکس پر کتنا ریلیف مل سکتا ہے یا پھر مزید کتنے ٹیکسز اس سیکٹر پر عائد ہو سکتے ہیں۔
آل پاکستان موٹرز ڈیلرز ایسوسی ایشن کے چیئرمین ایچ ایم شہزاد اکبر کا کہنا ہے کہ بجٹ میں تھوڑا ریلیف ملتا ہوا نظر آرہا ہے۔ کیونکہ آئی ایم ایف نے ڈیوٹیز کم کرنے کا کہا ہے اور دوسرا استعمال شدہ گاڑیوں کی کمرشل امپورٹ سے 5 سال کی پابندی ہٹانے کا بھی مطالبہ کیا ہے۔
مزید پڑھیں: خیبر پختونخوا کے 2000 ارب روپے پر مشتمل بجٹ میں خاص بات کیا ہوسکتی ہے؟
ایچ ایم اکبر شہزاد کہتے ہیں کہ اگر 5 سال تک پرانی گاڑیوں کی کمرشل امپورٹ سے پابندی ہٹا دی جاتی ہے تو اس سے 5 سال پرانی جاپانی گاڑیاں کافی سستی ہوجائیں گی، یعنی جب ملک میں کم قیمت والی گاڑیاں آئیں گی تو عوام کو فائدہ ہوگا اور جب امپورٹ میں اضافہ ہوگا تو حکومت کو ڈیوٹیز اور ٹیکسز بھی زیادہ ملیں گے۔
ایچ ایم اکبر شہزاد نے مزید کہا کہ آئی ایم ایف کی جانب سے حکومت کو ٹیکسز، ریگولیٹری ڈیوٹی، سیل ٹیکس اور فیڈرل ایکسائز ڈیوٹی کو کم کرنے کا بھی کہا گیا ہے اور اگر ایسا ہوجاتا ہے تو پھر آٹو سیکٹر پر مزید مثبت اثرات مرتب ہوں گے اور ایسا ہونا آٹو انڈسٹر کو زندہ رکھنے کے لیے ناگزیر ہے۔
انہوں نے مزید کہا کہ اگر پاکستان میں گاڑیوں کی امپورٹ میں اضافہ ہوگا تو یقیناً لوکل انڈسٹری بھی اپنے معیار اور کارکردگی کو بہتر کرنے کی کوشش کرے گی یعنی مقابلے کی فضا پیدا ہوگی اور بجٹ میں حکومت کی جانب سے یہ سب اعلانات کیے جائیں گے۔ باقی مزید کیا کچھ آٹو سیکٹر میں ہونے جا رہا ہے۔ وہ تو بجٹ یا بجٹ سے 2 دن قبل ہی پتا چلے گا۔
مزید پڑھیں: وفاقی بجٹ 26-2025: سولر پینلز کی قیمتوں میں کمی کا کتنا امکان ہے؟
پاک وہیلز کے بانی سنیل منج کا اس حوالے سے کہنا تھا کہ لوکل گاڑیوں یا موٹر سائیکل کی قیمتوں میں بجٹ میں عام آدمی کے لیے کوئی ریلیف نہیں ہوگا۔ صرف امپورٹڈ گاڑیوں پر ریگولیٹری ڈیوٹی تھوڑی سی کم ہو جائے گی۔ جو امیروں کی پر تعیش گاڑیاں ہیں، جیسا کہ لینڈ کروزر، پراڈو، مرسیڈیز، بی ایم ڈبلیو وغیرہ ان تمام گاڑیوں کی امپورٹ کی قیمت تھوڑی سی کم ہو جائے گی۔ مگر لوکل انڈسٹری کو کسی قسم کا کوئی ریلیف نہیں ملے گا۔
سنیل منج کا مزید کہنا تھا عام عوام کے ساتھ یہ ہوگا کہ فی لیٹر پیٹرول پر 100 روپے پیٹرولیم لیوی فکس کر دی جائے گی۔ اور کاربن ٹیکس بھی لگ رہا ہے تو کوئی خاص اچھی خبر کم از کم عوام کے لیے تو نہیں ہے۔
پاکستان آٹو موٹو مینوفیکچررز ایسوسی ایشن کے سابق ممبر شوکت قریشی کا کہنا تھا کہ ڈالر کی قیمت کچھ کم بھی ہو جائے اور بجٹ میں معمولی رعایتیں دی جائیں، لیکن یہ سب درآمدات سے جُڑا ہوا ہے۔ کیونکہ ہم یہاں صرف 30 فیصد ماڈلز بھی مقامی طور پر تیار نہیں کررہے۔
ٹويوٹا جیسی کمپنیاں الیکٹرک گاڑیوں میں دلچسپی نہیں لے رہیں، کیونکہ پیٹرول مافیا بہت طاقتور ہے، انہوں نے حکومتوں پر اثر ڈال کر الیکٹرک گاڑیوں کے متعارف ہونے میں رکاوٹیں ڈالیں۔ اس کے برعکس، کئی دوسرے ممالک نے سخت اقدامات کیے ہیں۔
اُن کی حکومتوں نے اعلان کیا ہے کہ 2030 تک صرف الیکٹرک گاڑیاں ہی بنیں گی اور فروخت ہوں گی۔ بدقسمتی سے، ہماری حکومت نے ابھی تک اس معاملے پر کوئی مضبوط فیصلہ نہیں کیا اور اس کی بڑی وجہ پیٹرول مافیا کا دباؤ ہے۔
