چیئرمین پاکستان تحریک انصاف (پی ٹی آئی) عمران خان کی اہلیہ بشریٰ بی بی نے الزام تراشی پر مسلم لیگ ن کی نائب صدر مریم نواز کو قانونی نوٹس بھجوا دیا۔
بشریٰ بی بی نے مریم نواز کیخلاف باضابطہ قانونی کارروائی کا آغاز کرتے ہوئے ایڈووکیٹ فیصل فرید کے ذریعے قانوی نوٹس بھجوا دیا ہے۔
قانونی نوٹس میں مریم نواز سے 7 روز میں بشریٰ بی بی سے غیر مشروط معافی مانگنے کا مطالبہ کیا گیا ہے۔
نوٹس میں دعویٰ کیا گیا ہے کہ مریم نواز نے یکم مئی کو لاہور میں ایک تقریر میں بشریٰ بی بی کے خلاف جھوٹی اور بے بنیاد الزام تراشی کی تھی۔
عدالتی نوٹس میں بیان واپس نہ لینے پر مریم نواز کو ضابطۂ فوجداری اور ہتک عزت سمیت متعلقہ قوانین کے تحت کٹہرے میں لانے کا کہا گیا ہے اور مریم نواز کی تقریر کا متن بھی نوٹس کا حصہ بنایا گیا ہے۔
نوٹس میں یہ بھی کہا گیا ہے کہ بشریٰ بی بی مکمل طور گھر کی دہلیز تک محدود باپردہ خاتون ہیں اور مریم نواز جان بوجھ کر بشریٰ بی بی اور ان کے اہلِ خانہ کو بدنام کرنے کے لیے مہم چلا رہی ہیں۔
عدالتی نوٹس میں مزید کہا گیا کہ غلط بیانی، ہرزہ سرائی اور سیاسی مقاصد کے لیے الزام لگانے پر ضابطہ فوجداری کے تحت 5 سال تک کی سزا ہوسکتی ہے۔
