عبداللہ (فرضی نام) کبھی منشیات کی لعنت میں مبتلا تھے۔ نشے کی عادت نے نہ صرف ان کی ذہنی صحت کو نقصان پہنچایا بلکہ وہ اکثر گھریلو جھگڑوں کا باعث بھی بنتی تھی مگر اب ان کی زندگی نے ایک نیا اور خوشگوار موڑ لے لیا ہے۔
یہ بھی پڑھیں: ژوب کے شہری کا قائم کردہ ادارہ منشیات کے عادی افراد کے لیے نئی زندگی کی نوید
وہ کراٹے کا بھی شوق رکھتے ہیں اور فی الوقت منشیات بحالی مرکز میں زیر علاج ہیں۔ انہوں نے وی نیوز سے گفتگو کرتے ہوئے کہا کہ ’اب میری طبیعت بہتر ہے، نشے سے دل ٹوٹ چکا تھا۔ لیکن اب میں بجلی کا کام سیکھ رہا ہوں اور بحالی مرکز سے فراغت کے بعد حصول روزگار کے ساتھ ساتھ کراٹے کی پریکٹس بھی دوبارہ شروع کروں گا‘۔
یہ بحالی مرکز بلوچستان حکومت کے سوشل ویلفیئر ڈیپارٹمنٹ کے زیر انتظام چل رہا ہے جہاں منشیات کے عادی افراد کا نہ صرف علاج کیا جاتا ہے بلکہ انہیں ہنر مند بھی بنایا جاتا ہے۔
مزید پڑھیے: کراچی میں انوکھا واقعہ، منشیات کے عادی 125 افراد کو عام شہریوں نے فرار کروا دیا
سینٹر کے سپروائزر تابش احد کے مطابق پہلے مریضوں کو 15 دن ڈی ٹوکسیفیکیشن کے عمل سے گزارا جاتا ہے اور پھر انہیں بنیادی تعلیم دینے کے علاوہ الیکٹریشن، درزی اور بلوچستان کا ثقافتی چپل سازی کا کام سکھایا جاتا ہے۔
