پاک سوزوکی موٹر کمپنی نے مالی سال 26-2025 کے وفاقی بجٹ میں عائد کیے گئے نئے ٹیکس اقدامات کے بعد اپنی تمام گاڑیوں کی قیمتیں بڑھادی ہیں، نئی قیمتیں یکم جولائی 2025 سے نافذ العمل ہو چکی ہیں۔
کمپنی کی جانب سے مجاز ڈیلرشپ کو جاری کردہ نوٹیفکیشن کے مطابق، نئی قیمتوں میں فیڈرل ایکسائز ڈیوٹی، سیلز ٹیکس اور حالیہ متعارف کردہ نیو انرجی وہیکل لیوی شامل ہیں، البتہ ایڈوانس انکم ٹیکس شامل نہیں ہے۔
پاک سوزوکی نے واضح کیا ہے کہ قیمتوں میں یہ اضافہ صرف حکومت کی جانب سے لگائے گئے نئے ٹیکسوں کی وجہ سے ہے، جبکہ پیداواری یا آپریشنل لاگت میں کسی قسم کا اضافہ صارفین کو منتقل نہیں کیا گیا۔
یہ بھی پڑھیں: سوزوکی موٹرسائیکل جی ایس 150 کا حصول اب قسطوں پر کیسے ممکن؟
سوزوکی آلٹو وی ایکس آر کی قیمت 2,827,000 روپے سے بڑھ کر 2,994,861 روپے ہو گئی ہے، جس میں 167,861 روپے کا اضافہ ہوا ہے، آلٹو وی ایکس آر اے جی ایس کی قیمت میں 177,480 روپے کا اضافہ ہوا اور یہ اب 3,166,480 روپے میں دستیاب ہے۔
اسی طرح آلٹو وی ایکس ایل اے جی ایس کی نئی قیمت 3,326,446 روپے ہے جو کہ پہلے 3,140,000 روپے تھی، یعنی 186,446 روپے کا فرق آیا ہے۔
کلٹس وی ایکس آر کی قیمت اب 4,089,490 روپے ہو گئی ہے، جو پہلے 4,049,000 روپے تھی، کلٹس وی ایکس ایل اپ گریڈڈ میں 43,160 روپے کا اضافہ ہوا ہے اور اب یہ 4,359,160 روپے میں فروخت ہو رہی ہے، اسی طرح کلٹس اے جی ایکساپ گریڈڈ کی نئی قیمت 4,591,460 روپے ہے۔
مزید پڑھیں: سوزوکی پاکستان کی ’آل ان ون‘ کار انشورنس میں خاص کیا ہے؟
سوزوکی سوئفٹ کی تمام ویریئنٹس کی قیمتیں بھی بڑھی ہیں، سوئفٹ جی ایل ایم ٹی اب 4,460,160 روپے میں، سوئفٹ جی ایل سی وی ٹی 4,605,600 روپے میں اور سوئفٹ جی ایل ایکس سی وی ٹی 4,766,190 روپے میں دستیاب ہے۔
سوزوکی ایوری کے دونوں ماڈلز کی قیمتوں میں بھی خاطر خواہ اضافہ ہوا ہے، ایوری وی ایکس کی قیمت 2,912,230 روپے جبکہ ایوری وی ایکس آر کی قیمت 2,965,200 روپے ہو گئی ہے۔
چھوٹی کمرشل گاڑیوں کی بات کی جائے تو راوی پک اپ اب 1,975,560 روپے میں جبکہ ڈیک کے بغیر راوی کی قیمت 1,899,810 روپے مقرر کی گئی ہے۔
ماہرین کا کہنا ہے کہ بجٹ میں ٹیکسوں کے اضافے سے کار ساز اداروں کے لیے قیمتوں میں ترمیم ناگزیر ہو گئی ہے، تاہم قیمتوں میں مسلسل اضافہ متوسط طبقے کے لیے گاڑی خریدنا مزید مشکل بنا رہا ہے۔
