نائب وزیراعظم و وزیر خارجہ اسحاق ڈار اور ترکیہ کے وزیر خارجہ خاقان فیدان نے اسلام آباد میں مشترکہ نیوز کانفرنس کی، جس میں دونوں ممالک کے درمیان برادرانہ تعلقات، علاقائی تعاون اور اقتصادی روابط کو مزید مستحکم بنانے پر اتفاق کیا گیا۔
یہ بھی پڑھیں:ترکیہ، پاکستان اور آذربائیجان 3 ریاستیں مگر ایک قوم ہیں: رجب طیب اردوان
اسحاق ڈار نے کہا کہ پاکستان اور ترکیہ کے درمیان مضبوط برادرانہ تعلقات قائم ہیں۔ دونوں ممالک کئی علاقائی اور عالمی معاملات پر یکساں مؤقف رکھتے ہیں۔ اُنہوں نے ترکیہ کے وزرائے خارجہ اور دفاع کی پاکستان آمد کو خوش آئند قرار دیتے ہوئے کہا کہ یہ اعلیٰ سطحی تبادلے دونوں ممالک کے گہرے تعلقات کا مظہر ہیں۔
انہوں نے کہا کہ مختلف شعبوں میں ترکیہ کے تجربات سے استفادہ حاصل کیا جا رہا ہے اور مشترکہ کمیٹیوں کے ذریعے باہمی تعاون کو فروغ دیا جا رہا ہے۔ نائب وزیراعظم کے مطابق دونوں ممالک کے درمیان باہمی دلچسپی کے مختلف امور پر بات چیت ہوئی اور پاک ترک دفاعی کمیٹیوں کا اجلاس آئندہ ستمبر میں متوقع ہے۔
اس موقع پر ترک وزیر خارجہ حکان فیدان نے اسحاق ڈار کی بھرپور میزبانی پر ان کا شکریہ ادا کیا۔ انہوں نے کہا کہ پاکستان اور ترکیہ کے درمیان منفرد نوعیت کے تعلقات قائم ہیں، جنہیں ادارہ جاتی شراکت داری میں تبدیل کیا جا رہا ہے۔ ان کا کہنا تھا کہ دونوں ممالک کی باہمی تجارت کو 5 ارب ڈالر تک لے جانے کا ہدف ہے۔
یہ بھی پڑھیں:پانی 24 کروڑ عوام کی لائف لائن، ترکیہ اور آذربائیجان جیسے دوست ہونا پاکستان کی خوش قسمتی ہے، وزیراعظم
حاکان فیدان نے بتایا کہ دونوں ممالک نے اقتصادی، ثقافتی اور دفاعی شعبوں میں تعاون کو فروغ دیا ہے، اور اب آئل اور گیس کے شعبوں میں بھی اشتراک بڑھایا جا رہا ہے۔ انہوں نے یہ بھی بتایا کہ ان کی وزیراعظم شہباز شریف سے کچھ دیر بعد اہم ملاقات متوقع ہے۔
نیوز کانفرنس کے اختتام پر دونوں وزرائے خارجہ نے اس عزم کا اعادہ کیا کہ پاکستان اور ترکیہ کے درمیان قریبی تعلقات کو مزید گہرا کیا جائے گا اور تمام شعبوں میں ادارہ جاتی بنیادوں پر تعاون کو وسعت دی جائے گی۔
