’اپنی زمین، اپنا گھر‘ پورٹل پر مزید درخواستوں کی وصولی کا عمل بند کردیا گیا ہے۔ وزیراعلیٰ پنجاب مریم نواز کی جانب سے غریب اور مستحق خاندانوں کو مفت پلاٹوں کی فراہمی کا منصوبہ اگلے مرحلے میں داخل ہو گیا ہے۔
یہ بھی پڑھیں:’جہاں ناانصافی ہو وہاں انتشار جنم لیتا ہے‘، مریم نواز کا عالمی یومِ انصاف پر پیغام
وزیر ہاؤسنگ پنجاب بلال یاسین نے بتایا ہے کہ صوبے کے 19 اضلاع میں آن لائن درخواستوں کے ذریعے 2 ہزار مفت پلاٹس دیے جائیں گے۔
اس حوالے سے ڈی جی پنجاب ہاؤسنگ اینڈ ٹاؤن پلاننگ سکندر ذیشان نے انہیں تفصیلی بریفنگ دی۔
بریفنگ میں بتایا گیا کہ ’اپنی زمین، اپنا گھر‘ پروگرام کے تحت اب تک 4 لاکھ 81 ہزار سے زائد افراد درخواستیں جمع کروا چکے ہیں، جن میں سے 3 لاکھ 67 ہزار سے زائد افراد کی درخواستیں ابتدائی سکریننگ کے معیار پر پورا اتری ہیں۔
یہ بھی پڑھیں:بے گھر افراد کے لیے پنجاب میں ہر روز مزید 300 گھر بننے لگے، ‘اپنی زمین اپنا گھر’ اسکیم کا اجرا
وزیر ہاؤسنگ نے بتایا کہ شفافیت اور سکروٹنی کے عمل کی نگرانی کے لیے 19 اضلاع میں کمیٹیاں تشکیل دی جا چکی ہیں، جبکہ متعلقہ اضلاع کے ڈپٹی کمشنرز کی سربراہی میں یہ کمیٹیاں ایک ماہ میں رپورٹ پیش کریں گی۔
بلال یاسین نے ہدایت کی کہ پنجاب ہاؤسنگ اینڈ ٹاؤن پلاننگ ایجنسی (پھاٹا) کے زیر انتظام اسکیموں کی بحالی کا کام جلد مکمل کیا جائے۔
انہوں نے مزید کہا کہ ’اپنی زمین، اپنا گھر‘ کے تحت مفت پلاٹ حاصل کرنے والے خاندان ’اپنی چھت، اپنا گھر‘ پروگرام کے تحت 15 لاکھ روپے تک کے بلاسود قرض سے بھی فائدہ اٹھا سکیں گے۔
