وزیراعلیٰ پنجاب مریم نواز نے عالمی یومِ انصاف کے موقع پر اپنے پیغام میں کہا ہے کہ جہاں انصاف کا چراغ بجھ جائے، وہاں ظلم کی تاریکی پورے معاشرے کو نگل لیتی ہے۔
یہ بھی پڑھیں:پنجاب میں مریم نواز ہیلتھ کلینکس کیسے کام رہے ہیں؟
انہوں نے کہا کہ انصاف وہ سورج ہے جس کی روشنی کے بغیر کسی قوم کی تقدیر کبھی روشن نہیں ہو سکتی۔
مریم نواز کے مطابق جہاں ناانصافی ہو، وہاں بداعتمادی، نفرت، فتنہ اور انتشار جنم لیتے ہیں، جبکہ ناانصافی نہ صرف فرد کو توڑ دیتی ہے بلکہ یہ فتنہ پورے معاشرے کی جڑوں کو کمزور کر دیتا ہے۔
انہوں نے کہا کہ اگر معاشرے میں انصاف نہ ہو تو ترقی، تعلیم، صحت اور خوشحالی سب ادھورے خواب بن جاتے ہیں۔
وزیراعلیٰ پنجاب نے کہا کہ پنجاب حکومت ہر فیصلے میں انصاف اور مساوات کو ترجیح دیتی ہے، اور ناانصافی کے خاتمے کے لیے سی سی ڈی اور پیرا جیسے ادارے قائم کیے گئے ہیں۔
انہوں نے کہا کہ پنجاب حکومت کی پالیسیوں کا مقصد یہی ہے کہ کسی سے بھی اس کا حق نہ چھینا جائے اور ہر فرد کو بلا امتیاز انصاف ملے۔
مریم نواز کا کہنا تھا کہ انصاف قائم رکھنا ہماری ذمہ داری بھی ہے اور حکومت ہونے کے ناطے ہمارا عہد بھی، کیونکہ انصاف وہ روشنی ہے جو پنجاب کے ہر شہری کی زندگی کو روشن کر سکتی ہے۔
