پی ڈی ایم اے نے خیبرپختونخوا میں مزید مون سون بارشوں کی پیشگوئی کرتے ہوئے ندی نالوں میں طغیانی اور پہاڑی علاقوں میں لینڈ سلائیڈنگ کا خدشہ ظاہر کیا ہے۔
ترجمان پی ڈی ایم کے مطابق خیبرپختونخوا کے بیشتر اضلاع میں 20 سے 25 جولائی کے دوران موسلادھار بارشوں کا نیا سلسلہ شروع ہونے کا امکان ہے، جس کے باعث مقامی ندی نالوں میں طغیانی اور پہاڑی علاقوں میں لینڈ سلائیڈنگ کا خدشہ ظاہر کیا گیا ہے۔
یہ بھی پڑھیں: مون سون کی سیلابی آفات میں پنجاب کی تیاری، خیبرپختونخوا کی کوتاہی؟
پی ڈی ایم اے کے مطابق دیر، سوات، چترال، کوہستان، مالاکنڈ، شانگلہ، بٹگرام، بونیر، کوہاٹ، کرک، بنوں، ٹانک، لکی مروت، ڈیرہ اسماعیل خان، باجوڑ، مہمند، خیبر، وزیرستان، اورکزئی، مانسہرہ، ایبٹ آباد، ہری پور، پشاور، چارسدہ، نوشہرہ، مردان، صوابی، ہنگو اور کرم کے اضلاع میں تیز ہواؤں، گرج چمک اور بارش کا امکان ہے۔
پی ڈی ایم اے نے خبردار کیا ہے کہ 21 سے 25 جولائی کے دوران سوات، چترال، مانسہرہ، کوہستان، ایبٹ آباد، بونیر، شانگلہ، نوشہرہ، مردان، صوابی اور گلیات کے علاقوں میں برساتی ندی نالے طغیانی کا شکار ہو سکتے ہیں۔
یہ بھی پڑھیں: مون سون بارشوں کا تیسرا دور: اچانک سیلاب اور لینڈ سلائیڈنگ کا خطرہ، محکمہ موسمیات کا انتباہ
ادارے نے ضلعی انتظامیہ، ریسکیو 1122 اور دیگر امدادی اداروں کو پیشگی اقدامات کی ہدایت جاری کرتے ہوئے کہا ہے کہ تمام وسائل بروئے کار لائے جائیں، حساس مقامات پر ٹریفک کی روانی یقینی بنائی جائے اور ندی نالوں و ڈرینج سسٹم کی صفائی مکمل کی جائے تاکہ شہری سیلاب سے بچا جا سکے۔
فصلوں کی بروقت کٹائی اور محفوظ مقامات پر ذخیرہ کرنے کی ہدایت
پی ڈی ایم اے نے کسانوں کو فصلوں کی بروقت کٹائی اور محفوظ مقامات پر ذخیرہ کرنے کی ہدایت دی ہے جبکہ مویشی پال حضرات کو جانوروں کے تحفظ کے لیے احتیاطی تدابیر اختیار کرنے کا مشورہ دیا گیا ہے۔
ادارے نے مسافروں کو قومی و صوبائی شاہراہوں پر محتاط رہنے اور ممکن ہو تو متبادل راستے اختیار کرنے کا مشورہ دیا ہے۔
پی ڈی ایم اے نے عوام سے گزارش کی ہے کہ آندھی، ژالہ باری یا گرج چمک کے دوران محفوظ پناہ گاہوں میں چلے جائیں اور ایمرجنسی کی صورت میں متعلقہ اداروں سے فوری رابطہ کریں۔
