لاہور: وزیراطلاعات پنجاب عظمیٰ بخاری نے کہا ہے کہ خیبرپختونخوا میں سینیٹ کی ٹکٹوں کے لیے تحریک انصاف میں کھلم کھلا ہارس ٹریڈنگ ہو رہی ہے، اور بانی پی ٹی آئی اس عمل میں مکمل طور پر شریک ہیں۔
انہوں نے الزام عائد کیا کہ پارٹی میں نظریاتی کارکنوں کو نظر انداز کرکے اے ٹی ایمز کو ٹکٹ دیے جا رہے ہیں۔ ان کے مطابق پارٹی ورکرز ہار گئے ہیں اور نوٹوں کی چمک جیت گئی ہے۔
مزید پڑھیں: دریائے سوات حادثہ: وزیر اطلاعات پنجاب عظمیٰ بخاری خیبرپختونخوا حکومت پر شدید برہم
عظمیٰ بخاری کا کہنا تھا کہ تحریک انصاف کے اپنے رہنما اور کارکنان اس غیر شفاف عمل پر بول پڑے ہیں، اور پارٹی کی اندرونی صفوں میں شدید بے چینی پائی جاتی ہے۔ انہوں نے مزید کہا کہ جو جماعت ماضی میں ہارس ٹریڈنگ کی سخت مخالف رہی، آج خود سب سے بڑی ہارس ٹریڈر بن چکی ہے۔
وزیراطلاعات نے کہا کہ خیبرپختونخوا میں تحریک انصاف تیزی سے غیر مقبول ہوتی جا رہی ہے، اور مجھے اس کے نظریاتی کارکنوں سے دلی ہمدردی ہے۔
