ٹھٹہ اور خیرپور کے قریب قومی شاہراہ پر پیش آنے والے دو مختلف ٹریفک حادثات میں 9 افراد جاں بحق جبکہ 45 سے زائد زخمی ہو گئے۔
پہلا واقعہ ٹھٹہ کے علاقے میں پیش آیا، جہاں کراچی سے کینجھر جھیل پکنک پر جانے والی بس تیز رفتاری کے باعث درسگاہ محمد علی کے مقام پر الٹ گئی۔ حادثے کے نتیجے میں 6 افراد جاں بحق اور 20 سے زائد زخمی ہو گئے۔
یہ بھی پڑھیں:ملائیشیا میں خوفناک بس حادثہ، یونیورسٹی کے 15 طلبا جاں بحق، 33 زخمی
ریسکیو ذرائع کے مطابق بس میں سوار افراد پکنک منانے کے لیے کراچی سے روانہ ہوئے تھے۔ زخمیوں کو قریبی اسپتال منتقل کر دیا گیا ہے، جہاں بعض کی حالت تشویشناک بتائی جا رہی ہے۔
دوسرا حادثہ خیرپور کے قریب اس وقت پیش آیا جب کراچی سے مانسہرہ جانے والی مسافر کوچ بارش اور تیز رفتاری کے باعث الٹ گئی۔ اس حادثے میں 3 افراد جان کی بازی ہار گئے جبکہ 25 سے زائد زخمی ہوئے۔
پولیس کے مطابق حادثے کی ابتدائی وجہ تیز رفتاری اور پھسلن بنی۔ ریسکیو ٹیموں نے موقع پر پہنچ کر زخمیوں کو قریبی اسپتال منتقل کیا۔
