بلوچستان ہائیکورٹ میں عمران خان کی آرٹیکل 5 کی خلاف ورزی پر آرٹیکل 6 کے تحت کارروائی کرنے سے متعلق دائر آئینی درخواست پر سماعت، عدالت نے دلائل سننے کے بعد فریقین کو نوٹس جاری کر دیے۔
بلوچستان ہائیکورٹ میں عمران خان کی جانب سے آرٹیکل 5 کی خلاف ورزی پر آرٹیکل 6 کے تحت کارروائی کرنے سے متعلق دائر آئینی درخواست پر سماعت چیف جسٹس بلوچستان ہائی کورٹ جسٹس نعیم اختر افغان اور جسٹس عامر رانا پر مشتمل 2 رکنی یبنچ نے کی۔
درخواست گزار ایڈووکیٹ امان اللہ نے کہا کہ اسمبلی تحلیل کرنے پر عمران خان نے آئین کے آرٹیکل 5 کی خلاف ورزی کی جس پر چیف جسٹس نعیم اختر افغان نے ایڈووکیٹ امان اللہ سے استفسار کیا کہ جسٹس مظہر عالم میاں خیل نے معاملہ پارلیمنٹ بھجوانے کا کہا تو کوئی پارلیمنٹیرین کیوں نہیں آیا درخواست لے کر، اس پر ایڈووکیٹ امان اللہ نے جواب دیا کہ پارلیمنٹیرین کی اپنی مجبوری ہوتی ہے۔
چیف جسٹس بلوچستان ہائی کورٹ نے کہا کہ آئینی درخواست میں اسپیکر اور ڈپٹی اسپیکر کو فریق نہیں بنایا گیا، ایسا لگ رہا ہے کہ جیسے آپ بھی مصلحت کا شکار ہیں، آپ نے درخواست اس لیے تو نہیں دی کہ یوٹیوب پر وی لاگ آ جائے؟
ایڈووکیٹ امان اللہ نے جواب دیا کہ آپ نے میرا آج تک کوئی وی لاگ دیکھا میں وی لاگ نہیں بناتا۔ عدالت نے فریقین کو نوٹس جاری کرتے ہوئے آئندہ پیشی پر جواب طلب کرلیا۔
