پاکستانی مسلح افواج نے پائلٹ آفیسر راشد منہاس شہید (نشانِ حیدر) کے 54ویں یومِ شہادت پر انہیں شاندار خراجِ عقیدت پیش کرتے ہوئے ملک کی خاطر ان کی عظیم قربانی کو فرض شناسی کی اعلیٰ مثال قرار دیا ہے۔
یہ بھی پڑھیں: پاکستان کا ’فتح‘ سیریز میزائل کا کامیاب تجربہ، دشمن کی جارحیت کا ہر قیمت پر جواب دیا جائے گا، آئی ایس پی آر
آئی ایس پی آر کے مطابق چیف آف آرمی اسٹاف فیلڈ مارشل سید عاصم منیر، چیئرمین جوائنٹ چیفس آف اسٹاف کمیٹی جنرل ساحر شمشاد مرزا، چیف آف نیول اسٹاف ایڈمرل نوید اشرف اور چیف آف ایئر اسٹاف ایئر چیف مارشل ظہیر احمد بابر سدھو نے اس موقع پر کہا کہ پائلٹ آفیسر راشد منہاس کی عظیم قربانی جرات، وفاداری اور فرض شناسی کی اعلیٰ ترین روایات کی علامت ہے۔
1971ء میں اس دن راشد منہاس نے غیر معمولی حوصلے اور بے مثال ایثار کا مظاہرہ کرتے ہوئے مادرِ وطن کی خودمختاری کے تحفظ کے لیے اپنی جان قربان کر دی تھی، ان کا یہ تاریخی فیصلہ، جس میں انہوں نے سرنڈر کے بجائے شہادت کو ترجیح دی، قوم کے اجتماعی ضمیر کو ہمیشہ روشن رکھے گا۔
مزید پڑھیں: بھارت اسرائیل ہے اور نہ پاکستان فلسطین، ہر حملے کا بھرپور جواب دیا جائے گا، ڈی جی آئی ایس پی آر
آئی ایس پی آر نے کہا کہ راشد منہاس شہید کی لازوال قربانی اور وطن سے محبت کی مثال مسلح افواج اور پوری قوم کے لیے ہمیشہ مشعلِ راہ رہے گی، مسلح افواج نے اس عزم کا اعادہ کیا کہ وطنِ عزیز کے دفاع کے لیے اسی جذبے اورعزم کے ساتھ اپنی ذمہ داریاں نبھائی جائیں گی، جس کی راہ راشد منہاس نے دکھائی۔
