شمالی کوریا کے رہنما کم جونگ اُن کی بہن کم یو جونگ نے ایک بار پھر جنوبی کوریا کے صدر لی جے میونگ کی امن کی پیشکش کو مسترد کر دیا ہے اور کہا ہے کہ ان کا ملک کبھی بھی جنوبی کوریا کو سفارتی شراکت دار نہیں سمجھے گا۔
کم یو جونگ نے جنوبی کوریا اور امریکا کی مشترکہ فوجی مشقوں کو بے وقوفانہ حملے کی تیاری قرار دیتے ہوئے کہا کہ صدر لی بظاہر امن کی بات کرتے ہیں مگر جنگی مشقیں جاری رکھ کر دوغلا پن دکھا رہے ہیں۔
یہ بھی پڑھیے: شمالی کوریا کا امریکا اورجنوبی کوریا کی فوجی سرگرمیوں سے قبل طاقت کا مظاہرہ
انہوں نے یہ تبصرہ منگل کو وزارتِ خارجہ کے اعلیٰ حکام کے ساتھ ایک اجلاس کے دوران کیا جس میں شمالی کوریا کے سفارتی حکمتِ عملی پر بات چیت ہوئی۔ ان کا کہنا تھا کہ جنوبی کوریا سنجیدہ اور دیانت دار نہیں، اس لیے اسے خطے کے سفارتی معاملات میں کوئی کردار نہیں مل سکتا۔
یہ بیان صدر لی کی اس پیشکش کے بعد سامنے آیا ہے جس میں انہوں نے کہا تھا کہ سیئول 2018 کے اُس فوجی معاہدے کو بحال کرنا چاہتا ہے جس کا مقصد سرحدی کشیدگی کم کرنا تھا، اور پیانگ یانگ کو اعتماد سازی کے اقدامات اور مذاکرات کی بحالی کی دعوت دی تھی۔
