وزیراعظم پاکستان شہباز شریف نے چینی صنعت کاروں کو پاکستان میں سرمایہ کاری کی دعوت دے دی۔
وزیراعظم ہاؤس میں چینی کمپنی شینڈونگ زن زو (Shandong Xinxu) گروپ کارپوریشن کے وفد نے وزیراعظم سے ملاقات کی، جس کی قیادت کمپنی کے چیئرمین ہیو جیانزن (Hou Jianxin) نے کی۔
یہ بھی پڑھیں: سی پیک فیز ٹو میں چینی صنعتوں کی پاکستان منتقلی کے امکانات پر توجہ ہوگی، وزیر خزانہ محمد اورنگزیب
اس موقع پر وزیراعظم نے اس بات پر زور دیا کہ پاکستان اور چین ہمیشہ ہر مشکل وقت میں ایک دوسرے کے ساتھ کھڑے رہے ہیں، اور مستقبل میں بھی یہ تعلقات مزید مستحکم ہوں گے۔
انہوں نے کہاکہ پاکستان چین کے ساتھ اقتصادی تعلقات کو نئی بلندیوں تک لے جانا چاہتا ہے اور چینی صنعتوں کو پاکستان میں سرمایہ کاری کی دعوت دیتے ہیں۔
وزیراعظم نے کہاکہ حکومت پاکستان خصوصی اقتصادی زونز کے قیام کے لیے چینی سرمایہ کاروں کو ہر ممکن سہولیات فراہم کرے گی۔ انہوں نے بتایا کہ ملک کے شپ بریکنگ اور شپ ری سائیکلنگ کے شعبوں میں وسیع مواقع موجود ہیں جن سے چینی سرمایہ کار بھرپور فائدہ اٹھا سکتے ہیں۔
بریفنگ میں بتایا گیا کہ شینڈونگ گروپ پاکستان میں میری ٹائم انڈسٹریل کمپلیکس کے قیام میں گہری دلچسپی رکھتا ہے اور کمپنی یہاں ایک گرین شپ بریکنگ یارڈ قائم کرنے کا ارادہ رکھتی ہے۔ اس کے علاوہ چینی کمپنی پاکستان میں ماہی گیری، فش پراسیسنگ اور کھجوروں کی پراسیسنگ کے منصوبوں پر بھی کام کرنا چاہتی ہے۔
کمپنی کے چیئرمین ہیو جیانزن نے حکومت پاکستان کی جانب سے سرمایہ کاروں کو دی جانے والی سہولتوں پر وزیراعظم کا شکریہ ادا کیا اور پاکستان میں منصوبوں پر کام کرنے کے عزم کا اظہار کیا۔
یہ بھی پڑھیں: پاکستان، چین، افغان وزرائے خارجہ کا اجلاس، سی پیک کو افغانستان تک توسیع دینے پر اتفاق
ملاقات میں وفاقی وزیر بحری امور جنید انور چوہدری، وزیراعظم کے مشیر ڈاکٹر توقیر شاہ اور دیگر اعلیٰ سرکاری حکام بھی موجود تھے۔
